CULTURE – LA FABRICHE DAI… LIBRIS. Te nestre leterature al mancje inmò alc

Dopo des polemichis su la inconsistence de narative furlane contemporanie che a jerin nassudis cu la premiazion dal Sant Simon za fa doi agns, a son stadis fatis diviersis iniziativis che a àn cirût di stimolâ une riflession e un confront in clâf propositive su la scriture par furlan. Tra chestis, une des robis plui interessantis di chest an al è stât l’incuintri-laboratori «Striçâ, no straçâ» davuelt ai Colonos di Vilecjaze tal dopodimisdì dai 23 di Avost, juste prime de serade de premiazion dal concors par zovins autôrs sul «romanç in trê riis». A un doi mês dal event o vin sintût il coment, une vore interessant, di Carlo Tolazzi, un dai autôrs plui atîfs tes polemichis che si diseve, che al è intervignût tal laboratori fevelant de scriture teatrâl.
Cuâl isal stât il struc dal to intervent?
Mi è dificil visâmi di ce che o ai dit ae cunvigne, jo o ai fevelât de scriture teatrâl e o ai sotlineât cemût che e sedi, pe sô nature, za une scriture sintetiche e une vore sute, e che, par altri, si poiedi su situazions agjidis, che, dulà che a puedin jessi fatis, a finissin cul sostituî la peraule.
Cuâl isal il stîl ideâl?
Al inizi de mê formazion tant che dramaturc, mi è stât conseât di bande di regjiscj, atôrs, dramaturcs e altris, di sintetizâ, di jessi sut, adiriture di veicolâ i messaçs in maniere oblicue plui che direte. O ai ancje marcât che te opare teatrâl e sedi une vore evidente la ripetizion, la robe dite dôs voltis, erôr che, cuant che nol sedi volût par esigjencis particolârs, al è simpri miôr evitâ.
Cemût isal lât il laboratori?
Su la cunvigne in gjenerâl o marchi la sorprese vude pe partecipazion dal public, un grum plui consistente di ce che si podès spietâ.
Ce podìno disi de situazion de scriture par furlan?
Il dât che al è burît fûr al è che al mancje un insegnament dal scrivi, dal componi,
dal creâ un romanç. Trê riis o cent pagjinis nol conte, ce che e mancje e je une tradizion in lenghe furlane.
Maurizio Biasizzo