CULTURE – In Svuizare la tierce edizion di Suns

O vevin Priska tal palc e duncje dal sigûr, ancje se par chest an no vin puartât a cjase nissun premi, le bandiere de musiche furlane e je restade ben alte. La tierce edizion di Suns, il festival de cjançon in lenghe minoritarie nassût a Udin tal 2009 su progjet de ARLeF, al à premiât il grup austriac di minorance cravuate Coffeeshock Company par la energjetiche esecuzion de lôr cjançon Gusla mi se je znicila, toc reagge cun influencis rock. Il premi dal public invezit (dât de sume dai vôts di sale e di Internet), che tal 2010 al incoronave i nestris Resistence in Dub, al è lât al zovin grup ladin Cuntra Löm. Uniche presince furlane, la cjantautore cjargnele Priska, che e à incantât il public cul so toc Hajra: rangjament perfet e interpretazion profonde indi.
Chest an la manifestazion si è davuelte a Falera, te Svuizare rumance, intune suaze gnove – la kermesse e nas par jessi itinerant – e pai organizadôrs al è rivât l’obietîf principâl che al è ae fonde dal festival, ven a stâi creâ une rêt jenfri lis diviersis comunitâts di minorance.
Cumò o spietìn l’apontament ai 19 di Novembar cul event european Liet International, cuant che une babêl inovative des lenghis de minorance e sunarà pe prime volte dongje, li dal Teatri gnûf “Giovanni da Udine”.
www.liet.nl/en/internationaal,
www.ARLeF.it
Natascia Gargano