L’EDITORIÂL – Principi e sostance

Cjataitmi cualchidun che nol sedi dacuardi sul concet di libertât o di democrazie. Cualchidun che, in chest moment, nol sberli cuintri i privileçs dai politics. Anzit, dispès a son propit lôr i prins.
Al vûl dî che si pues ancje implenâsi la bocje di principis e po dopo movisi in mût dal dut diviers.
Ma alore, tra principi e sostance puedie jessi difarence?
Cjapìn la cuestion de lenghe furlane a scuele. Gjavât cualchi fassiston a diestre e cualchi statalist a çampe, a son pôcs chei che, in linie di principi apont, no sedin dacuardi: ma no si va indenant, anzit.
Ancje te Glesie e funzione compagn. Figurâsi se si cjate cualchidun contrari ae lenghe dal popul par cjacarâ cun Diu! Ma trops sono i predis che le doprin pe liturgjie? A disevin justementri chei di Glesie Furlane, che l’impuartant de leture continuade de Bibie nol jere dome l’event in se, ma il segnâl, il fat che si podès sburtâ a doprâ il furlan tes funzions religjosis, in ogni lûc e ogni dì. Che la Glesie uficiâl e podeve cjapâ fuarce e coraç de tante int che e veve rispuindût ae manifestazion.
A son dome doi esemplis, ma la mê impression e je che in chest moment si vedi la tindince a contentâsi dai prins, parcè no si rive a risultâts concrets sui seconts. Al è plui facil sberlâ e scrivi che al è just doprâ il furlan in Consei regjonâl, ancje se si scuen vê i tradutôrs, pluitost che sburtâ i nestris rapresentants furlans a doprâlu pardabon.
E scusait se mi sune ridicul doprâ e paiâ int par che e tradusi chel che ducj a puedin capî!
Ma no bisugne dîlu, parcè al è just par principi.
Cussì, anìn indenant cun chei, e intant cui che al comande la barache, i sorestants, a van indenant pe lôr strade e no ur free nuie dai Furlans.
Il Friûl al somee che al stedi a cûr a ducj, plui in passât a dîle sclete, parcè che vuê e va di mode fevelâ di teritori, e “si à di vê une vison unitarie de Regjon”. E intant a stan preparant lis riformis istituzionâls, cu la abolizion des provinciis e lis Unions dai comuns. Cussì che sot la vôs Friûl, si cjatarà il vueit aministratîf e istituzionâl.
Altri che amôr declarât: e sofle invezit la vecje voie di ripuartâlu sotan e soredut cence sperance.
O vin di fâ un grant sfuarç inteletuâl: rivâ a tignî dûr sui principis e cirî la lôr traduzion in pratiche. Un esempli al rive di Migjee, dulà che il sindic al ten dûr su la presince de minorance furlane, tutelade par leç, come element par mantignî la scuele tal paîs.
Principi e sostance o a van dacuardi, o se no a son bufulis.
DREE VALCIC