SPECIÂL BIBIE – La Biblie en continu: la idee

Dopo Limoges tal 2005, Mantue e Lille tal 2007, Angers tal Zenâr dal 2008, la leture de “La Bible en continu” e à vudis diviersis replichis tal 2008: tal Otubar a Rome, dai 5 ai 11; a Bologne, dai 12 ai 18, a Belo Horizonte in Brasîl dai 19 ai 25, a Valenciennes dai 26 al Prin di Novembar.
Diviersis a son stadis lis motivazions che a àn sburtât chestis leturis: Rome e ospitave il Sinodi dai Vescui su la Peraule di Diu, Valenciennes le veve inserite tal calendari des iniziativis pe fieste dai mil agns di Saint-Cordon di Valenciennes, Bologne e altris a vevin dome voie di continuâ daûr dal esempli di Limoges, Mantue, Lille e Angers.
E dopo des diviersis edizions che a àn metût adun la comunitât cristiane mondiâl par cheste iniziative definide ancje “un idee magnifiche, un progjet mat, un at vêr”, come che si pues lei ancje sul sît www.labibleencontinu.com, cheste cjadene e je continuade rivant fint Friûl.
E se ogni volte l’event che si ripet al rapresente une aventure uniche che “e je di ducj e no je di nissun”, la edizion furlane e je stade ancjemò “plui uniche” par vie che, come che nus confermin de organizazion, «e jere la prime volte che si à doprade une lenghe minorizade»
DUT AL NAS IN CJARGNE_ Si dîs che la Cjargne e je la mari dal Friûl. Ma ancje de Leture continue de Bibie par furlan. Di fat la idee di puartâ chest event te nestre Patrie e je nassude propit une sere di Istât dal 2010 a Mion, frazion di Davâr, tal cjanâl di Guart.
Pre ‘Sef Cjargnel e pre Laurinç Dentesan, components de associazion Glesie Furlane (www.glesiefurlane.org), a jerin ospits a cene di une famee di Spilimberc che e passe lis vacancis propit a Mion «Ta chê sere o jerin invidâts a cjase di Renata, Vigji e Matieu» nus conte pre ‘Sef «E cun nô a jerin ancje il President de Provincie Pieri Fontanini, l’assessôr regjonâl Claudio Violino e il President de Agjenzie regjonâl pe lenghe furlane Lorenzo Zanon».
«Jo o vevi sintude une vôs» nus spieghe pre ‘Sef «mi jere rivade tes orelis che un gruput di students de Universitât di Udin, che no ai inmò rivât a capî cui che a jerin, vignûts a cognossince de esperience fate a Rome tal 2008, a vessin vude voie di puartâ la leture de Bibie continuade ancje chi».
«Al somee adiriture che a vessin proponude la idee al Consei pastorâl diocesan, ma che il dut al fos colât tal vueit» al continue pre ‘Sef «Alore fevelant, ur vin butade la idee di fâle a Fontanini, Violino e Zanon e lôr nus àn rispuindût subit di sì, e cussì dut si è inviât dut l’iter pe organizazion de Leture continuade de Bibie par furlan!»
Di li a son vignudis lis primis riunions te sede de Agjenzie regjonâl pe lenghe furlane che e je stade l’ent catalizadôr che al à rivât a coinvolzi dutis lis istituzions che dopo a àn permetude la realizazion di chest grant event, tacant des trê provinciis e lis trê diocesis furlanis di Gurize, Pordenon e Udin, la Regjon, il comun di Udin, fint a rivâ al messaç augurâl dal Vatican e la medaie celebrative dal President de Republiche taliane.
Come che al comente il diretôr da La Patrie dal Friûl, Dree Valcic, si è tratât di «Un event che al à superât il fat religjôs e linguistic e che al torne a da fuarce a chel spirt identitari dal popul furlan che masse dispès cualchidun al fâs fente di no cognossi o, piês, al ignore e al cîr di distudâ».
Christian Romanini