CULTURE – Cartufulis… dapardut!

Tra lis tantis specialitâts e prodots tipics de nestre Regjon, a nd’è un prodot dal nestri ort che no si cjate dome chi in Friûl ma al è fondamentâl par preparâ un dai plats plui bogns e cognossûts de regjon. Clamìnlis patatis, cartufulis o ce altri, ma cemût si fasaressial a fâ il frico cence di lôr?
In Friûl a esistin diviersis zonis che a van une vore ben par coltivâ lis patatis, che a van de provincie di Gurize a chê di Udin, fint a chê di Pordenon.
La patate e je un aliment fondamentâl pal nestri “vivi furlan”: la tradizion alimentâr dal Friûl e je plene di chescj prodots. Lis coltivazions a son presintis in dute la regjon e a produsin patatis di diviersis faturis e formis. A Davolêt, dongje Çopule, in provincie di Pordenon, di 33 agns in ca la Pro Loco, insiemi cu la Co.pro.pa (la cooperative dai produtôrs di patatis de zone), a organizin une fieste par celebrâ un dai prodots dai nestris orts che al è fondamentâl inte nestre alimentazion. Chest an si è tignude il mês di Lui e e à vût un grant sucès. Une cunvigne, fate in colaborazion cun Ersa, e à mostrât ce che di bon al pues vignî di chest aliment tradizionâl furlan.
TANTIS CUALITÂTS_ I produtôrs de cooperative a produsin patatis tipichis dal Friûl: un pôc plui piçulis dal normâl, di variis cualitâts: Marabel, Agata, Vivaldi –  une vore adatis par sedi fritis, intal for o in umit; Imola, Kennebec, Virgo, Finka – a paste blancje, sutis e farinosis; Kuroda – cu la scusse rosse, buinis par fâ salatis.
Une seconde fieste, o sagre (clamìnle cul so non!) e je chê dal frico (il nestri plat, patatis, cevole e formadi) di Flaiban tal mês di Avost e che e va insiemi ai festezaments di Sante Filumene.
«In Friûl o vin simpri vût prodots bonissims e di cualitât – al dîs l’assessôr regjonâl aes risorsis rurâls, agroalimentârs e forestâls Claudio Violino – no stoi a ripetimi, parcè che al è tant che o dîs che il nestri prodot agroalimentâr al vâl. Ancje par chest motîf o stin cirint di valorizâ lis nestris produzions par mieç des sagris, che par noaltris no son une fieste e vonde, ma a son un mieç par puartâ indenant la nestre culture, ancje agroalimentâr».
Cinzia Collini