TERITORIS – INTERNAZIONÂL. La crisi dai media galizians

Une musiche che nus pâr di vê za sintude. E je di fat inmò tal aiar chi di nô la crisi de informazion in lenghe furlane che e riscje di sierâ la bocje ai nestris mieçs di comunicazion (Radio Onde Furlane e Il Diari docent). Ma ancje in altris paîs europeans che a scombatin pe lôr lenghe “minorizade” lis robis no van miôr. E je di fat di cualchi setemane indaûr la notizie che il gjornâl scrit fûr par fûr in galizian, “Hoxe” che al jere dal grup Correo Gallego, al à scugnût saludâ i siei letôrs par une crisi economiche, si lei tal comunicât stampe, “une vore fuarte, soredut in face ai tais radicâi dal sostegn istituzionâl, rindint cussì impussibil il progjet dal gjornâl galizian”.
DASPÒ 8 AGNS DI ATIVITÂT_ La sieradure dal gjornâl (che si continuarà a cjatâlu dome sul sît web www.galiciahoxe.com) e à par di plui lassât a cjase ben 18 dipendents; ma chest nol è bastât par ve indaûr “une rispueste clipe de societât e des istituzions, che no son di meti a paragon cul guvier basc e catalan par chel che al rivuarde jutoris par progjets come chest”, si continue a lei sul comunicât stampe.
Il gjornâl, nassût ai 17 di Mai dal 2003, in coincidence cu la Zornade de Leterature galiziane, al à cussì sierât tal 75m inovâl de adozion dal prin statût di autonomie; ma, magari cussì no, “Hoxe” e je la tierce testade gjornalistiche monolengâl che e à sierât intal ultin an in Galizie, insiemi cun “Vieiros” (www.vieiros.com) e la storiche riviste dal nazionalisim galizian “A Nosa Terra” (www.anosaterra.org), ducj restâts dome in version in linie.
Il BNG (Bloc Nazionalist Galizian) si è lamentât che cul guvier dal PP (Partît popolâr) a son za trê lis testadis storichis galizianis a vê sierât e a àn pandût il lôr marum pe gnove brute su la lenghe.
Dut câs in dì di vuê a ‘nd è inmò cualchi media in lenghe galiziane, come il cuotidian a gratis “De Luns a Venres”, la riviste mensîl di informazions critichis “Novas da Galizia” e chê di politiche e societât “Tempos Novos”.
OLTRI AL DAM…_Come se chest nol fos za avonde la Xunta (il guvier regjonâl galizian) al destine i bêçs pe politiche linguistiche a media scrits par spagnûl. Intai ultins agns di fat a son stâts miârs i euros dâts in sussidis, sovenzions o acuardis cul Ministeri pes politichis linguistichis ai gjornâi che a fasin la lôr version integrâl in lenghe spagnole e che a doprin il galizian dome par declarazions dal popul o te Zornade de leterature galiziane.
Ancje cheste nus pâr musiche za sintude…
Redazion