MEDITANTLIS TAL SO CÛR. Il biliet di ingrès

A son di scoltâ cun grande atenzion; a son pôcs, simpri mancul. A son la ultime vôs di  une int che e à savût di patî. A son i emigrants: feminis e oms di valôr che e àn molât cheste tiere cjalant a un mont gnûf, a un gnûf avignî. A àn fat il biliet e a son lâts, partîts cence nuie e nô o vin gjoldût de monede che a fasevin rivâ, des ideis che tornant a puartavin, dal bon non che a àn lassât intal mont intîr.
Partint e patint, i emigrants a àn fat cressi il Friûl; nô al contrari lu vin smenteât, fat calâ: di fat o stentìn a jessi furlans; nus àn imbonîts e alienâts.
Torne invezit a ce che tu sês; scuvierç, al disarès Pasolini, il to inconfondibil savôr e colôr. No sta fâ il moderni e il sapient lant a slàs, a mat vie.
No sta alçâti parcè che tu vâs cul carel al supermarcjât: un popul dome passût al devente egoist, ignorant e violent.
No sta lassâti inceâ dal mît di une uniche culture mondiâl e multimediâl: la Europe cu la sô superculture e à fat vueris, coloniis e sclâfs: e à falît.
No sta crodi che e rivi intal mont une uniche lenghe. Lis lenghis a nassin de int e la int e vîf in lûcs dal dut difarents. Cjacare pardut e simpri furlan.
No esistin popui plui grancj e plui piçui, maiorancis e minorancis: la vite di un frut no vâl plui di chê di un anzian. Deliberiti di chel vioditi simpri minôr e inferiôr parcè che furlan.
No sta iluditi di valê parcè che to fi al sa navigâ in internet: l’internet al è svelt, al fâs comut, ma une gjenerazion “copie e incole” e je cence doman.
Riscuvierç il ben che i tiei vons te sapience ti àn tramandât. Torne ai valôrs dal Vanzeli e dal spirt. Al dîs Cˇechov intune sô conte che tal spirt al sta il vêr progrès, l’unic pussibil, indispensabil pe umanitât. E chest, prin de tecniche, dal computer, dal viazâ e dal cjacarâ par inglês.
Cualchidun mi viodarà sierât e esagjerât. No; cjapìn il coragjo dai emigrants e tornìn a partî; comprìn il biliet e paìn il presit che al è di paiâ: chel dal valôr primarûl de persone, dal rispiet di ogni popul, lenghe e culture. E sarà cheste la uniche comunitât umane che e podarà vê un avignî.
pre Tonin Cjapielâr