AI 32 DI MAI. Rimedis cuintri il cjalt (version furlane)

Al sta sucedint alc di pardabon strani tes ultimis setemanis. Alc di gnûf, che no si à mai viodût prime: al è rivât l’Istât, e cun chel il cjalt.
Ce disêso? Al sucêt ducj i agns? Pardabon? Parcè che a sintî i gjornâi e la television al samee un fat straordenari: cu la notizie dal cjalt a vierzin i titui dai telegjornâi e a butin jù pagjinis e pagjinis di conseis su cemût vivi in chestis temperaduris tropicâls. Come se i agns stâts o vessin passâts i mês di Lui e di Avost al Pôl Nord, intabarossâts cu lis pelicis di bo musclât de Groenlandie.
Ma si sa, i gjornaliscj a van simpri a cirî cualchi scoop: di Istât i politics a son in feriis (par dî il vêr, a son in feriis dut l’an ma di Istât no si sfuarcin nancje di fâ fente di lavorâ) e il campionât di balon ancje, e cussì al reste pôc di ce fevelâ.
E alore vie a fânus crodi che il cjalt al sedi une novitât, e a intervistâ esperts che nus dan conseis su cemût difindisi dal cjalt: ce mangjâ, ce fâ e ce no fâ. E di bon che a son i esperts: cemût fasaressino, se no, a savê che di Istât al è miôr bevi tant? O che bisugne mangjâ plui pomis e verdure e mancul frico e muset? O che tes oris plui cjaldis nol sarès conseât stâ sot dal soreli?
Dut câs, i furlans no ur stan daûr cuissà ce a chescj conseis, anzit. Prin, parcè che un furlan nol à di difindisi di nissun. Secont, parcè che un furlan nol scolte nissun consei che nol vegni di un furlan, o se propite al scuen, lu seguìs te maniere furlane.
Baste viodi ce che a fasin i miei cuant che al rive l’Istât: cuant che il cjalt al devente masse fuart, a van tal ort. No a polsâ sot di un arbul: propite a lavorâ. Al è chel chi il rimedi preferît dai furlans cuintri il cjalt (ma ancje cuintri il frêt, la ploie, lis invasions di zupets e dutis lis plaiis di Egjit). Cuant che al lavore tal ort, il furlan nol sint plui nuie. Cun di plui, al fâs cressi lis pomis e la verdure che l’espert al veve conseât di mangjâ. Il consei di bevi une vore? Chel lu cjape un pôc ae largje: invezit di bevi plui aghe lôr, a dan plui di bevi aes plantis, ma in fonts ce cambial?
E cjalant ator pal paîs, o viôt tancj rimiedis difarents cuintri il cjalt: cualchidun al piture i scûrs (cussì la cjase e stâ miôr in ombrene), cualchidun altri al scomence a fâ lens pal Invier (cussì, pensant al frêt, al samee mancul cjalt). L’impuartant al è cjatâ alc ce fâ.
Al à capît dut, il furlan: l’unic mût par copâlu, il cjalt, al è fâlu murî di fature.
BETE DI SPERE