ATUALITÂT – IL SIVILOT. Referendum, scufiots par ducj… ma in particolâr par cualchidun

A no àn di jessi contents i partîts dal risultâts dal referendum. Se la robe e je clare pal Pdl e pe Leghe, e somee strane pal Pd. Dut câs, e je cussì se si fermìn no ae muse politiche dal risultât, chê dal scufiot a Berlusconi, ma al specific des domandis referendariis. Cence lâ dentri tal fat se a àn rason o mancul su la cuestion de aghe, in tancj dentri il Pd a pensin a une sostanziâl privatizazion dai servizis. Sul nucleâr, propit a Triest, la posizion de Hack le dîs lungje su lis contradizions de Çampe. Ma in gjenerâl, si à di ricognossi che la bataie pai referendum le àn fate e a àn vinçût.
E cumò? Di une bande, cualchidun al pues vê la voie di meti il cjapiel al risultât e – prime di dut – ai comitâts, i vincidôrs seris des elezions. Chest al vûl dì inschiriâsi su la Tav, sul eletrodot, su la dighe di Pinçan e vie indenant. Viodarìn. Pal moment, cui che al sta piês – ma o sin usâts zaromai –  al è il president Tondo che nol è lât a votâ e, tant che ai timps di Craxi, al à falât une altre volte.
Po dopo, piês il tacon de buse sul nucleâr, dulà che al torne fûr cu la bufule di Krsko, tant par no savê ce dî.
Ancje i leghiscj no stan miôr. Cualchi peraule di Fontanini, ma nissun dai lôr sorestants che al vedi dite “o votarai sì, o votarai no”. Il cidinôr al somee jessi la consegne: intant i lôr eletôrs a son lâts a votâ pardabon, e in tancj. Va tu dopo a spiegâi la posizion su Mediocredito dulà che, dopo che si spietave la montafin, e je finide cul puest di vicepresident par Pizzimenti che – cidin cidin: al è propit un viziut – al passe di un biel puestut, l’Ater, a un altri.
Plui che di lote e di guvier, il Carroccio al somee la reclam di “Sofà & Sofà”: “Beato chi se lo fa”. La cjadree naturalmentri.
L’OM DI BURI