ATUALITÂT – VTC in digjitâl

Chê di VTC – VideoTeleCarnia e je une storie che e nas intal 1980, in gracie di dôs grandis passions:  chê pes cinepresis di Mario De Cillia e chê altre pal mont de comunicazion de sô femine Giuseppina Pittino.
E cussì, dal studi di vie 4 di Novembar di Trep di Cjargne, in dôs stanzis rigjavadis in cjase lôr, a scomencin la grande aventure; un lavôr un grum impegnatîf pal fat che al tocje stâ simpri atents a ce che al sucêt di fûr de puarte di cjase, documentâsi, regjistrâ, meti adun i servizis… Di fat, VTC e à simpri volût rivâ intes cjasis cun servizis ben fats, curâts cun precision e dedizion, ancje se il cost di paiâ al è alt: oris e oris di lavôr. Ma cuant che e je la passion, dut al devente plui sempliç!
SIMPRI PLUI LONTAN_ Il segnâl di VTC, che sul imprin al rivave dome tes cjasis di Trep, cul lâ dal timp si è slargjât a Liussûl, Paluce, Sudri, Çurçuvint, Monai, Darte, Zui, Paulâr e tes primis cjasis di Tumieç; cualchi an di autonomie di gjestion e dopo, cui mudaments des leçs, in gracie di un acuardi cun Telefriuli, VTC al mande in onde i siei programs dôs voltis pe setemane. Une television che e cjape subite pît parcè che e cjacare cu la int, e da spazi e atenzion ai problemis e ai fats dal teritori, e e jemple il vueit di informazion – plui o mancul volût – dai mieçs publics, de RAI Regjonâl e dai grancj mass media.
WEB E DIGJITÂL_ Tal 2006, VTC – vierzint un sît internet (www.videotelecarnia.it) – e scurte lis distancis cun furlans e cjargnei ator pal mont, e cun ducj chei che a vuelin cognossi la nestre tiere.
Cualchi mês fa, il gnûf sisteme di trasmission dal digjitâl terestri al segne inmò une sielte coragjose di VTC che, mantignint la colaborazion cun Telefriuli, e jentre tal so multiplexer gjestint in propri il canâl LCN 690 e fasint cognossi i siei programs par dut il Friûl. Un pas grant che De Cillia e Pittino, insieme ai tancj colaboradôrs volontaris, a àn volût fâ par continuâ a vê une television gjenuine, cence tancj salamelecs, libare di leams politics, atente ae storie, ae culture, aes lidrîs dal teritori; pronte a dâ spazi a dibatits, a documentaris e a cui che al è taiât fûr de societât.
Daspò 30 agns, la informazion ‘made in Cjargne’ e va indevant, cence pierdi la muse, cirint di stâ al pas cui timps de moderne tecnologjie.
Marta Vezzi