VIERZIDURE – Un altri pas su la strade de indipendence

Alex Salmond al conferme la vitorie che al veve concuistât tal 2007, cuant che al veve rivât a fâsi nomenâ prin ministri dal guvier scozês, che pe prime volte al viodeve un indipendentist ae sô vuide.
Ma rispiet al prin, za straordenari, sucès cu lis elezions di Mai di chest an, il Pàrtaidh Nàiseanta na h-Alba (par gaelic e par inglês Scottish National Party), al à rivât a fâ inmò miôr. Di fat, dongje de incressite di consens personâl pal so leader, invezit de maiorance relative che e jere vignude fûr 4 agns indaûr, chest colp il Partît Nazionalist Scozês al à cjapade la maiorance assolude dal Parlament istituît sul finî dai agns Novante. Pe prime volte duncje il SNP al à la pussibilitât di guviernâ di bessôl cence cirî acuardis cun fuarcis tant che laburiscj o liberâi democratics, che ta chescj agns a vevin frenât sul procès pe indipendence di Londre.
La vitorie clare dal SNP no à sparagnât consecuencis ancje par chês altris fuarcis politichis: Iain Gray, il leader dal Labour Party in Scozie, dopo vê pierdude ancje la “fuartece laburiste” di Glasgow, si è dimetût.
Il stes prin ministri di Londre David Cameron, ametint il sucès de fuarce indipendentiste, si è complimentât cun Salmond e al à dimostrât une cierte disponibilitât pe Scozie, rimarcant il plen rispiet pal risultât. Ma al à ancje fat intindi daurman che al fasarà di dut par evitâ la separazion scozese e mantignî unide la Grande Bretagne.

Ma Alex Salmond nol à pôre e no si ferme. Vuê al pues contâ su 69 parlamentârs elets suntun totâl di 129 (tal 2007 il SNP al veve vût 47 rapresentâts elets) e al è za daûr a imbastî il troi par rivâ a davuelzi il referendum su la indipendence che al veve za anunciât tal 2007. E cence nancje la dibisugne di chei ats violents che, magari cussì no, a àn compagnât i procès di autodeterminazion dai popui in altris bandis dal mont. Un percors che pas dopo pas al à tant che fin chel di recuperâ chê plene indipendence gjoldude, no dome prime dal 1707, an dal Act of Union che al veve eliminât il Parlament scozês e unît il ream di Scozie cun chel de Ingletiere, ma fintremai prime dal 1603, an de union des dôs coronis sot di un unic re.
Christian Romanini