CULTURE – LA FABRICHE DAI… LIBRIS. L’Arbul Feliç

In prin al è dome une semençute, po ben planchin, cul passâ dal timp, l’Arbul Feliç al cres e al devente un miluçâr biel e fuart.
Une parodie de vite che e conte in maniere dolce il passaç des stagjons, l’evolvisi dal timp; l’Arbul Feliç di fat al nas e al devente grant contantnus ce che al sucêt dilunc de Vierte, de Istât, de Sierade e dal Invier, gjoldint di ce che i sucêt e di ce che al à tor ator.
In chest audio libri, vendût insiemi al cd, la storie si le lei pagjine dopo pagjine compagnâts de vôs che e conte de autore, Lussia di Uanis, artiste e poetesse che di agns e lavore intal cjamp de istruzion cun progjets didatics pai fruts, soredut in lenghe furlane. Si scoltin, oltri a lis musichis al piano di Annalisa Masutti, ancje i rumôrs dal vint, des besteutis che a compagnin la vite di Feliç, lis cjançonutis che a judaran i frutins a jentrâ cu la fantasie ta chest mont magjic. Il libri di fat al è indreçât ai plui piçui che a podaran seguî lis vicendis dal arbulut gjoldint ancje dai biei dissens di Elena Chiandussi.
Il libri, burît fûr dal editôr Serling soc. coop., al à 48 pagjinis, al è in lenghe furlane cu la traduzion, in code, par talian; il cd audio al dure 25 minûts. Si si pues cuistâ intes librariis o li dal editôr (0432 649131, coop@serling.org) cul presit di 20 euros.
Redazion