CULTURE – Spietant il Liet

Une sabide di inizi Primevere, la citât di Udin e à dât acet a un incuintri une vore speciâl. Frisons, grisons e asturians, si son cjatâts ae stesse taule cui coleghis furlans par organizâ l’event european di riferiment de musiche in lenghe di minorance: il Liet International. In festival al è nassût in Frisie, in Svuizare si davuelzerâ la edizion 2011 di Suns e tes Asturiis il Liet 2012. Il Friûl invezit chest an al fâs di paron di cjase parcè che, lu savìn, il grant finâl de kermesse musicâl al sarà ospitât li dal Teatro Nuovo Giovanni da Udine ai 19 di Novembar cu ven.
Ent principâl dal acuardi di colaborazion, la Agjenzie Regjonâl pe Lenghe Furlane, che e cure la organizazion insiemit cun Province e Comun di Udin e cu lis cooperativis “Informazione Friulana” e “Il Campo”. «Pal Friûl e par dute la regjon cheste e je le prime grande finâl di musiche in lenghe minoritarie, une ocasion une vore impuartante par dut il bagai di tradizions e cognossincis che e si puarte daûr e par la atenzion di dute Europe cui siei rifletôrs che a saran pontâts achì»,
al a comentât Paolo Paron, che pe Arlef al al à seguît di dongje i lavôrs dal grup organizadôr.
Tal palc dal festival – che al è ae sô otave edizion – si confrontarn 11 grups, e di chescj 5 a saran selezionâts jenfri lis minorancis “organizadoris” di Frisie, Austurie, Friûl, Isulis Faroe. Doi puescj a saran garantîts ai vincidôrs di Suns (o ricuardìn i nestris R.esistence in Dub, favorîts dal vôt popolâr prime a Suns e dopo in Bretagne al Liet 2010).
De bande di Arlef no àn intenzion di esaurî cheste ricjece che e rive di lontan dome intune serade: “La finâl dai 19 e sarà precedude di anticipazions tal teritori, ancje in provincie di Pordenon e di Gurize, dulà che i grups si esibiran fûr de citât, cul obietîf di dâ une conotazion il plui pussibil “regjonâl” ae manifestazion”, al continue Paron. A son in progjet seradis di promozion za in Istât e po dopo tancj altris events corelâts, dai concierts ai percors di leture – ducj rigorosementri in lenghe di minorance – cussì che in Novembar il Friûl al deventi une vere capitâl des minorancis e des lôr espressions culturâls. E cuissà che, zuiant in cjase, nol puarti ancje ben pe nestre musiche.
Natascia Gargano