CULTURE – Leteraturis platadis

Al è vignût fûr dal editôr Carrocci il libri di Anna Bogaro “Letterature nascoste. Storia della scrittura e degli autori in lingua minoritaria in Italia”. Il test, insiorât di une prefazion dal linguist Tullio De Mauro, al nas dal lavôr puartât indenant de autore tai siei studis di dotorât e al ven a jemplâ un vueit culturâl cirint di deliniâ un vision organiche de storie e dai scrits, in particolâr di narative, fats intes lenghis minoritariis de republiche.
Il libri al è dividût in trê parts. La prime e analize cemût che si e evolude tal timp, dentri de culture taliane, la cuestion Lenghe-Dialet, la seconde e conte la storie des leteraturis minoritariis principâls, cun cjapitui su chê sarde, su chê slovene, su chê ladine, su la furlane, la ocitane e la albanese.
La tierce part e presente une schirie di intervistis cun autôrs tant che Pahor, Soriga, Abate, Tolazzi, Verra e Bronzat.
Il lavôr si davuelç intun teren scuasit dal dut inesplorât, dulà che a mancjin studis, cognossince e aprofondiments. Si trate di une operazion une vore impuartante che e stice un grum di resonaments e e vierç un sac di cuestions a secont dal pont di analisi di partence.
Se si tache cjapant la culture taliane e ven in evidence la problematiche de esistence di une schirie di piçulis leteraturis diferentis di chê nazionâl dulà che la analisi critiche fate fin cumò, fondade su la classificazion
lenghe-dialet, no somee suficiente.
«La Italie e jê multilengâl e no lu sa», al dîs De Mauro tes pagjinis de prefazion e subit al zonte «e nancje e à masse voie di savêlu».
Se po si metisi de bande des lenghis minoritariis al è une vore interessant il confront e la cognossince de storie e de evoluzion des produzions leterariis di chês altris. Dutis a àn vût di frontâ une schirie di problematichis similis, e il viodi ce che a àn fat o no son ancjemò rivadis a fâ al permet di resonâ su lis robis cence fâsi masse cjapâ de scalmane polemiche locâl.
O pensi ai discors des tematichis frontadis, al confront fra tradizion e modernitât, ae cuestions de grafie e des varietâts, ae mancjance di une analisi dal valôr leterari, al rapuart cul talian, e vie indenant.
In sumis il libri al vierç la strade a dute une schirie di pussibilis tematichis di profondî e al fâs une opare di scuvierte che e leve fate.
Maurizio Biasizzo