TERITORIS – INTERNAZIONÂL. I siopars de fam che a àn scjassât il mont

Chest an a colin i 30 agns dai siopars de fam puartâts indenant dai presonîrs republicans inte preson di Long Kesh in Irlande dal Nord là che a àn pierdût la vite Bobby Sands e altris nûf militants dal Esercit Republican Irlandês (IRA) e dal Esercit di Liberazion Nazionâl Irlandês (INLA).
Cundut che no jere la prime volte che i presonîrs republicans a dopravin cheste forme di proteste o che cualchi militant al murive, i fats dal 1981 a son stâts une tragjedie che e à segnât a fuart la storie resinte de Irlande e che e à vût un rivoc cence precedents ancje fûr de isule.
La repression violente metude in at in Irlande dal Nord cuintri dai moviments pai dirits civîi che a denunciavin il regjim di discriminazion in vore cuintri de comunitât nazionaliste irlandese, e veve inviât un conflit viert tra i grups armâts republicans, lis fuarcis di polizie e l’esercit britanic.
Il guvier di Londre al veve slargjât la legjislazion di emergjence e lis misuris repressivis; intal 1976, par crevâ il morâl dai republicans, al veve decidût di gjavâ il status di presonîrs politics a ducj i arestâts par reâts leâts al conflit.
Cuintri dal tentatîf di fâju passâ par criminâi comuns, i presonîrs a vevin inviât une schirie di protestis simpri plui duris e tal 1980 al jere partît ancje un siopar de fam. Cuant che il prin dai sioperants si cjatave aromai sul ôr de muart, il segretari di stât pe Irlande dal Nord al veve prometût di acetâ lis domandis dai presonîrs e la proteste si veve fermade.
Cuant che si capìs che la promesse no sarà rispietade al tache un altri siopar de fam: Bobby Sands al partìs il prin di Març dal 1981 e po, a man a man, i van daûr altris volontaris dal IRA e dal INLA. La proteste e mobilite disinis di miârs di personis in Irlande dal Nord e la poie ae lote si slargje ancje intal rest dal mont, ma il guvier bitanic nol sint resons.
Bobby Sands al mûr ai 5 di Mai. Scuintris violents a scjassin la Irlande dal Nord e manifestazions di proteste si davuelzin in cetantis citâts dal mont. Tra i 12 di Mai e i 20 di Avost a muerin ancje Francis Hughes, Raymond McCreesh, Patsy O’Hara, Joe McDonnell, Martin Hurson, Kevin Lynch, Kieran Doherty, Thomas McElwee e Michael Devine. Ai 3 di Otubar la proteste e finìs dopo che diviersis fameis a àn domandât di alimentâ i presonîrs jentrâts in come.
Il struc miôr di chestis lotis tragjichis si le cjate intes peraulis di Gerry Adams (Sinn Féin): «Tal 1976 il guvier britanic al veve cirût di criminalizâ i presonîrs republicans; tal 1981 a son stâts i presonîrs republicans a criminalizâ il guvier britanic».
Te ultime pagjine dal so diari Sands al à scrit: «Se no rivin a sdrumâ il desideri di libertât no puedin crevâti. No mi crevaran parcè che il gno desideri di libertât e la libertât dal popul irlandês a son tal gno cûr». A son lis peraulis di un fantat che al amave la vite, ma che cu la sô muart al à mostrât al mont che la dignitât e la voie di libertât a son plui fuartis di ogni preson.
Carli Pup