AI 32 DI MAI. Jemplìn il stadi!

A son lontans i timps che al puest di “Alè Udin” si cjantave “Al è ultin” par butâle in ridi e dismenteâ la enesime disfate. Di cualchi an, i nestris fantats nus àn usâts a vinci. No a vinci dut, al è clâr, e nancje a vinci un pôc sì e un pôc no: in gjenar, l’Udin al fâs une rie di vitoriis che ti fâs crodi che il scudet aromai al sedi matematic, e dopo al scomence cuntune rie di sconfitis che lu parin jù fin te zone retrocession. O, come chest an, il contrari. No par nuie l’Udin al è blanc e neri: lis sfumaturis no fasin par lui.
Ma il vêr tifos furlan nol mole: ancje se la scuadre e va mâl, lui le seguìs simpri, al stadi, in trasfierte o lant a cjatâle a Roncjis in aeropuart cuant che e torne la sere. Parcè?
Par almancul cinc motivazions.
Prime. Il furlan al è coerent, simpri. Se si svee la matine ledrôs al è ledrôs dut il dì (se si svee content, invezit, si pues simpri voltâ in piês). Se al seguìs l’Udin, lu seguìs simpri, che al vadi ben o che al vadi mâl. Tant ancje se si va in B si reste simpri plui in alt da la Triestine.
Seconde. Il furlan nol seguìs lis modis. Anzit. Al è scuasit content che l’Udin nol vadi masse ben, parcè che cussì nissun lu pues acusâ di tifâlu nome parcè che al va ben.
Tierce. Nissune television taliane e fevele mai dal Udin, e stâ daûr al Udin e je la uniche maniere par lamentâsi che nissune television taliane no feveli de nestre scuadre.
Cuarte: il tierç timp. No, no chel dai zuiadôrs: chel dai tifôs. Lâ a viodi la partide, par un furlan, al è dome l’inizi. Dopo, fûr dal stadi, dongje des machinis, si zuie une altre partide: al vinç cui che al à puartât plui robe di mangjâ: salams, persuts, pan, vin e formadi, ancje une gridele. Se l’Udin al à vinçût, si mangje par fâ fieste, se l’Udin al à pierdût, si mangje par pensâ a alc altri. Se al à paregjât, si mangje e vonde, cence une reson.
E par ultime: il spirit di sacrifici. Il furlan al va al stadi simpri e no si fâs fermâ da la ploie, dal aiar o dal frêt. Anzit: al è plui content, parcè che cussì, dopo, al pues disi “jo no mi fâs fermâ da la ploie!” (o dal aiar, o dal frêt). No par nuie il Stadi Friuli lu vevin fat viert: parcè che il furlan al è plui content se si sacrifiche.
A proposit: ai 22 di Mai, pe ultime di campionât, o vin di jessi ducj al stadi, par une motivazion o chê altre. Se l’Udin no si zuie plui nuie, o sarìn dongje di lôr pal spirt di sacrifici furlan. Se si zuiarà la cualificazion in Champions, o judarìn Pozzo cui lavôrs pal gnûf stadi: pe contentece, o butarìn jù chel vecjo cussì al sarà bielzà pront di tornâ a tirâ sù.
BETE DI SPERE