CULTURE – FRIÛL TAL ETERE. Il balon al devente di ducj

Il program radiofonic plui moderni e, duncje, plui indevant di dutis lis antenis furlanis lu à Onde Furlane. Si clame il “Balon al è di ducj”. Si che duncje, un gno ami, che nancje al sa trops zuiadôrs che a tirin il balon intune partide e che des impresis dai fantats di Guidolin, la domenie, a indi fâs di mancul, mi à telefonât chê altre setemane par domandâmi cui mai che al fos stât chel Enrico Turloni, che vie Facebook lu veve coopatât dentri di un grup, particolarmentri atîf di coments, dibatiments e chat. Il grup virtuâl su Fb al jere, apont, chel de trasmission di Rof.
O soi lat a spiâ. E o ai vude la iluminazion.
La pensade di Turloni e je divierse di cemût che facebook al ven doprât di altris trasmissions o cjanâi televisîfs locâi. Il condutôr al fâs la sô diramazion fisiche, continuazion di un dibatiment, za fat o in corse. Moment par pandi gnovis, che nol pues dâ in direte. Come se ce che al è stât dit fintremai in chel moment nol ves mai fin. E chel che no si rive adore a contâ par mancjance di timp, al continue intun altri spazi, dulà che vincui di vôs e di opinions, tecnics o psicologjics che a sedin, si sfantin: la rêt.
Il radioscoltadôr al mangje cence mai saceâsi.
In altris Paîs dal mont si dopre il stes sisteme. O viodevi propit chê altre dì, il cjanâl televisîf american Cnn cul nomenât anchor Anderson Cooper, che al invidave a seguî i inzornaments e a mandâ un personâl contribût su lis cuistions, doprant facebook, twitter o a spiâ servizis esclusîfs par il web. Ce dî? Il grup virtuâl al fâs deventâ chest balon pardabon di ducj. Magari cussì no, ae fin si cjate dentri ancje int che no centre o no voleve savênt. Convertide di cetante inovazion. O speri che cualchidun a copii il model. Par esempli, un non a câs: Telefriuli. In principi e ae fin dal tg, il gjornalist nus vise: «Vi ricordiamo la nostra presenza su facebook. Cercateci». Vêr, ma digjitait e cjatait lis diferencis, tal mût di doprâ l’imprest. Ae trasmission di Turloni al va ricognossût il primât di vê dât une altre dimension ae radio. Oltri la unidirezionalitât comunicative dal microfon. Chapeau.
PS: A proposit de vuere di Tavagnà (che si viodi articul dal mes passât), spiait une altre mosse. Di un mês, part de programazion di “Free” e je passade ancje sul satelite (593 di Sky), insiemit cu la sûr Antennatre Nordest.
JAN TOTI