CULTURE – Scoltant l’incjant

E cumò la Americhe. Daspò dal debut in grant stîl cul conciert organizât de Provincie di Udin che al à viert il gnûf an al Teatri Gnûf di Udin, il prossim pas al sarà «puartâ la musiche de tradizion furlane di là dal ocean». Se za di par se fâ gospel par furlan al podeve someâ une imprese azardose, l’incjant che il Zenâr passât al à jemplât il Giovanni da Udine» nol lasse plui dubi. Il FVJ Gospel Choir, fondât e diret di Rudy Fantin e Alessandro Pozzetto, al à puartât sul palc tocs de tradizion musicâl furlane come Primevere, Stelutis Alpinis o Ave o Vergjine, riviodudis te une inedite version gospel. «Cjantâ lis propris lidrîs cuntune clâf moderne al è simpri stât un insium», al à dit Pozzetto, «cumò che la mission e je lade in puart, al è timp di disvilupâ chest filon e, parcè no, puartâlu fint tai Stâts Unîts. O proponarìn rangjaments gnûfs, dal funk, al rock al hip hop: o crôt che chest al sedi il canâl just par svicinâ ae musiche de nestre tradizion ancje i fîs dai emigrants». E alore lassaitnus maraveâ, il scoltâ al podarès jessi par nuie scontât.
Natascia Gargano