AI 32 DI MAI. E dopo la ploie, ducj in mascare!

A mi è simpri plasût il carnevâl, cuant che o jeri piçule. Tal gno paîs si faseve une sfilade bielissime e il nestri cjar al jere simpri il plui biei di ducj, o dut câs un dai miôr.
E a scuele nus fasevin fâ dissens e lavoruts e nus contavin des mascaris, chês tradizionâls.
La plui famose e jere Arlecchino, forsit par vie di ducj chei colôrs che al veve intor: al meteve ligrie, al plaseve a ducj i fruts. Arlecchino al ven di Bergamo, e al è un servidôr un pôc imbroion. Dopo al è Balanzone, un dotôr bolognês plen di presunzion; Pantalone e Colombina, un marcjadant e une servidore, ducj i doi di Vignesie, e Pulcinella, un altri servidôr, nome napoletan, e ancje altris, plui o mancul famôs. Ma nancje un furlan. Cuissà parcè. Nol sarès tant dificil fâ une mascare furlane. Anzit: nol sarès stât tant dificil se Pulcinella no nus ves freâts i colôrs. Al è clâr che une mascare furlane e varès di jessi blancje e nere, ma al è clâr ancje che no si pues fâ une mascare furlane che si puedi sconfondi cuntune napoletane!
Ma pazience. Cjatarìn un altri colôr. Il blu, par esempli: chel de nestre bandiere.
Naturalmentri la mascare furlane no varès di jessi chê di un servidôr, parcè che il furlan al è masse braurôs par stâ sot dai pîts di cualchidun altri, ma nancje un paron o un dotôr, parcè che al è masse bon par meti i pîts parsore di chei altris. Al podarès jessi un contadin, par esempli. E vistîsi di blu parcè che chel al è il colôr de ploie, che pai contadins e je simpri une buine robe. Sglavinut, al podarès clamâsi.
A proposit di ploie. La sfilade dai cjars di Sedean e je simpri stade une vore biele, e je vere, ma e je simpri stade ancje une vore rimandade par vie dal brut timp, tant che ancje la ARPA regjonâl e samee che le dopràs come strument di prevision: la dì che e jere programade la sfilade, i meteorolics a metevin ploie. Percentuâl di sigurece de prevision: 100%. La sfilade e vignive fissade une domenie di carnevâl, e vignive rimandade intune domenie di cuaresime, e e podeve rivâ scuasit a Pentecostis (une volte mi pâr di vê viodût une sfilade tor la dì dai Sants).
I contadins, cuant che al vignive un periodi di sut, a domandavin al comun di organizâ une sfilade di carnevâl.
Forsit, duncje, cualchidun al à bielzà inventât une mascare furlane. Forsit Sglavinut al esist.
Al sta dome spietant une domenie cence ploie par jessî fûr e fâsi viodi.
BETE DI SPERE