ATUALITÂT – La Peraule di Diu cu la vôs dal Popul

Pre Checo Placerean al diseve «Par un popul no vê la Bibie te sô lenghe al è come par un om presentâsi cul cjapiel in man, denant dal paron. Se un popul invezit al à la Peraule di Diu te sô lenghe al è come un om che al pues presentâsi cul cjapiel sul cjâf, cun stesse dignitât denant di ducj». Cun chest spirt e je rivade insom la grande vore de traduzion de Bibie par furlan cun pre Antoni Beline za passe 25 agns indaûr. E cul stes spirt il 2011 al sarà l’an de Leture continuade de Bibie par furlan, prin câs dulà che e sarà doprade une lenghe minorizade par un event za realizât in Francie e in Italie, par 24 oris su 24, di Domenie ai 3 a Sabide ai 9 di Avrîl, alì de Glesie de Puritât a Udin.
FEDE E CULTURE_ L’event, che al à tant che ent di riferiment la Agjenzie pe lenghe furlane, al sarà un moment di promozion pe lenghe furlane, ma no si trate dome di chest aspiet.
Tornâ la Peraule di Diu al Popul par che il Popul le proclami te sô lenghe mari, al è un grant at di fede che al torne a puartâ la Scriture Sacre al so significât di liberazion. Di fat la Bibie e je il test che al testemonee il Verp dal Signôr, Diu de liberazion dai popui piçui.
EVENT ECUMENIC_ Come che al è stât marcât di plui bandis, al è un moment che al ponte a meti adun i Furlans, sedi chei che a son a stâ in Friûl, sedi chei che a son a stâ fûr de Patrie. Par intant cheste iniziative e à rivât a vê la condivision no dome des istituzions civîls (dutis 3 lis Provinciis Furlanis di Gurize, Pordenon e Udin), ma ancje di chês religjosis cu la partecipazion de Arcidiocesi di Gurize, de Arcidiocesi di Udin e de diocesi di Concuardie e Pordenon. E a son za in vore i contats cun Rome.
GRANT SIMBOLISIM_ L’event al cjape duncje il savôr di un grant moment simbolic considerade ancje la date sielte. Il moment de Cuaresime al cjape dentri chest an la date dai 3 di Avrîl, aniversari de istituzion dal stât patriarcjâl di Aquilee, nassût tal 1077. Cun di plui, il dut si davuelzarà juste un mês prin de vignude dal Vescul di Rome, Benedet XVI, che ai 7 di Mai al fasarà visite a la Basiliche Mari dal Friûl.
APEL AI LETÔRS – Ven a lei ancje tu
La Patrie dal Friûl e fâs apel a ducj i siei letôrs par che a partecipin in maniere ative al event de leture de Bibie par furlan, in program dai 3 ai 9 di Avrîl dal 2011.
A coventin passe 1300 volontaris.
Si pues notâsi, tant che letôr singul o tant che grup di letôrs, sedi par telefon, tacant di miercus ai 2 di Fevrâr, clamant il numar 0432/555979 dal lunis al vinars des 10.00 aes 13.00 e des 17.00 aes 20.00, o pûr scrivint ae direzion bibie@regione.fvg.it. Il numar al è valit ancje par domandâ informazions e sclariments.
Christian Romanini