ATUALITÂT – Pe salvece de Cjargne

Te storie de Cjargne, dongje di chê dai 13 di Dicembar dal 2010 a Paluce, e je stade zontade une altre date: chê dai 15 di Zenâr stâts a Tumieç. Plui di 4.000 personis si son cjatadis sul puint di Cjanive par cjapâ part ae manifestazion organizade dal Coordenament dai Comitâts de Mont Furlane insieme ae Pro Gailtal de Carinzie. Tor lis dôs, dopo vê cjantât cun Aldo Rossi e Lino Straulino, la int che e jemplave dut il puint e à tacât la marce viers Tumieç: denant il strisson “Unità-Dignità”, subit daûr i fruts e po dopo la maree des personis. E sameave une procession cence fin: int di ogni etât cun cartei di proteste di ogni sorte e pronte a fâsi sintî cun sivilots, pignatis, craçulis, sampogns… e tantis bandieris dal Friûl. Rivâts te place, il programe al varès previodût la fermade devant dal Domo ma tal ultin (al pâr par pressions intimadatoriis dai sorestants civîi) la glesie no à permetût di doprâ il sagrât e cussì la polse e je stade fate devant dal municipi, dulà che si jere sistemât il Coro di Sant Ilari che al à intonât i trê imnis ‘Carnorum Regio’, ‘Mameli’ e chel da la Austrie. Dôs peraulis par insuazâ il parcè de manifestazion e po inmò une cjaminade par vie Linussio, G. De Marchi e vie Rome, par sierâ il cercli tornant te Place indulà che a son stâts fats i intervents.
I INTERVENTS_ “O sin un popul che vuê si è unît”, al à scomençât don Di Piazza, “o esprimìn il dolôr di une tiere progressivementri bandonade, dulà che no si è agjît cun progjetualitât e operativitât. Par progjetâ e agjî al vûl cûr e sintiment, culture e capacitât… Jo o soi achì cun voaltris parcè che o soi cjargnel, par condividi cun voaltris la cjarte universâl dai dirits dal om, la nestre Costituzion e il vanzeli di Gjesù di Nazaret…
La partecipazion straordenarie di vuê e je la espression di une lontanance de politiche che no scolte e che no dialoghe. Nol è plui pussibil progjetâ implants di cualsisei sorte cence ponisi prin, intant e dopo, la concezion etiche des conseguencis su lis personis e sul ambient vitâl.”
“Vuê achì e je une Cjargne determinade”, al à continuât Renato Garibaldi (Carnia in movimento”), “no sin cuintri il progrès ma cuintri chei che a imponin il progrès pe speculazion. In cheste place si respire arie di democrazie, di libertât, di autonomie. O sin achì par impensâ che il ben comun al vâl di plui dai ordins di partît. Dome cu la unitât o podarìn resisti ai atacs dai speculadôrs.”
Ma no si à di dismenteâ che vivi in Cjargne al vûl dî tignî dûr “ancje se i contribûts no rivin”, e conte Sonia Dionisio di Lauc, cun cuatri fîs e une aziende agricule cun cuarante vacjis. “O scuen vendi plui di trê litris di lat par un cafè, plui di cinc par un litri di gasoli. Di cui ise la colpe se al tocje vivi cussì?”
“I politics a àn di scoltâ la int”, al dîs Di Piazza, primari tal ospedâl civîl di Tumieç, “o vin bisugne di politics che a sepin scoltâ… no dome sot elezions. La Cjargne no à di tasê ma e à di fâ sintî simpri la sô vôs.”
“Li dentri vuê”, al va indenant Franceschino Barazzutti (Moviment Mont) segnant il barcon dal ufici di indulà che il sindic di Tumieç al cuche, “invezit di tignî i barcons sierâts, se a vessin vût un pôc di judizi a vierzevin i barcons par che al jentràs un pôc di aiar di cheste primevere anticipade cjargnele.”
Une primevere che si ere za viodude intal 1967 “te manifestazion dal siopar gjenerâl cuintri la sopression dal trenut e pal disvilup de Cjargne”, al ricuarde Marco Lepre (Leghe Ambient), “cun 5.000 personis… ancje chê volte il limit al jere stât passât”.
“O vin di finîle di ubidî! O vin di deventâ plui triscj! Nô si batin pe legalitât”, al à vosât Aldevise Tibaldi (Friûl Rurâl). “O sin un popul sôl, o vin dirit ae autonomie che e je stade stabilide de Costituzion e o vin di pratindile e parâ vie cheste etnie di politics, e no viodile plui in chestis placis. No àn di permetisi di cjapânus in zîr.”
“Nissun politic degn di chest non al pues ignorâ il segnâl che al rive in maniere cussì civîl di cheste manifestazion”, al conclût il moderadôr e gjornalist Alessandro Di Giusto. “O speri une dì di podê finî la storie di cheste vicende contant che la nestre Regjon e à dimostrât di jessi, une volte in plui, civîl e progredide. Il progrès si misure ancje daûr di cemût che nô o gjestìn il nestri ambient e il nestri teritori. Massime par cui che al vignarà dopo di nô.”
Marta Vezzi