CULTURE – CABLÂT & CONTENT. «Cemût cul blog?»

Cuâl ise la situazion dai blog in marilenghe, tai ultimps timps? Al è passât un pôc di cuant che, tal 2003, o vierzevi “il prin blog fûr par fûr par furlan”, ILfurlanist. In chê volte, come che aromai al sucêt par ogni novitât che ven fûr sul web, al boom i corispuindeve la tipiche demonizazion che e ven fate par solit a ogni gnove espression nassude in rêt. Robe che cumò a sta sucedint par Facebook, par esempli, ma cheste e je une atre storie: tornìn ai blog.
Il blog, intal 2003 sinonim di peteçs on line e informazion fate a slas, aromai al è percepît adiriture al contrari: une informazion indipendent e alternative ai canâi tradizionâi. Ridusûts tal numar par vie di Facebook, si pues dî che e je aumentade la lôr cualitât, stant che cui che ju doprave tant che diari personâl on line al à vût cjatât la colocazion ideâl te creature di Zuckemberg.
La situazion dai blog furlans duncje? No masse buine: blog masse pôc inzornâts, vierzûts ma lassâts li tant che un sît di contignûts, e cualchidun fat a la tant e tant vie che no rivin mai a miorâ.
Dentri di chei plui inzornâts l’unic convincent al è Contecurte, rignuvît di resint cul passç de plateforme Splinder a Blogger. Tal blog o ai une zate dentri ancje jo, ma il merit al è dut di Raffaele Serafini: rubrichis, variis colaboradôrs, inzornament costant. Interessant chel dal Partît Democratic di Palaçûl, ben inzornât che però nol rive ancjemò a stiçâ, a incidi. Viodarìn plui indevant.
Un panorame no tant alegri, ma si à di dî che lant sul agregadôr di blog che o ai metût su, Macôragregadôr,  li che a son dentri ducj (se al è scjampât alc si pues segnalâ par mail) ogni dì tu âs 3 o cuatri robis di lei. Alc al è alc.
Insumis, al samee che a sedin pôcs chei che a vedin alc di dî par furlan, o forsit il probleme al è jessi bogns di fâlu, venastaj di scrivi la lenghe, il grant probleme dai furlans. Il blog, difat, al è un imprest valit par cui che al à alc di dî e che no rive a vê acet tai media tradizionâi, tai blog furlans par talian a ‘nd è plui di un esempli, che magari o larai a scrutinâ tes puntadis che a vegnaràn.
Dree Venier