CULTURE – ART-Â. Arrigo Poz, tal cûr dal Friûl

A son pôcs i artiscj, come Arrigo Poz, leâts ae societât contadine furlane bogns di esprimi chei valôrs umans e cristians inlidrisâts te popolazion. La produzion zovanîl dal artist e je chê plui leade al teritori furlan e cumò si podarà gjoldile propit tai lûcs che a àn ispirât lis oparis in gracie de mostre «Arrigo Poz. Tal cûr de storie dal Friûl», promovude pai 80 agns dal mestri di Itineraria, la associazion des guidis turistichis autorizadis pe regjon Friûl-Vignesie Julie.
Poz al nas a Cjiscjel di Porpêt tal 1929. La sô opare e va de piture a fresc al mosaic, de ramade ai lavôrs a vueli e tempare, realizâts simpri cuntune grande sensibilitât pal colôr. L’artist al è un testemoni unic dal Nûfcent, viodût dal profont des sôs origjinis furlanis, cuntun realisim vivarôs e espressionistic mai cjariât, ma vivût cun grant rispiet pe condizion dal om, frontât cu la cussience clare dal dolôr inevitabil dal vivi e cu la convinzion, ancje chê une vore salde, de fuarce de sperance e de maestât de vite. Il percors artistic al è un itinerari di storie, storie sociâl, art e fede, un itinerari dulà che la bielece e coincît cu la fede cristiane e la fede cu la anime di un popul, che dal cûr dal Friûl al cjale cidin, ma cun cussience profonde, i aveniments etics e sociâi che a segnin il Nûfcent european.
Screade ai 16 di Otubar, la mostre si compon di trê sezions: «Epifanie de lûs: lis ramadis» te glesie di Sant Antoni abât a Udin, «Jenfri il mît e la realtât: il Friûl di Poz» te vile Caiselli di Curtiel di Pavie di Udin e «Un paîs al conte» te sede polifunzionâl «Pre Lino Andrioli» a Bicinins. A son esponudis sù par jù 130 voris dal artist sedi di caratar religjôs sedi profan, lavôrs a vueli e tempare e studis di ramadis ancjemò inedits.
In particolâr, te sale di Bicinins – lûc cjâr al pitôr, par vie che li e jere la vecje scuele di infanzie dulà che Poz al veve il so studi e al frescjà lis sôs primis oparis – a son in mostre i ritrats des personis che i stevin ator – amîs, parincj e paisans – e i paisaçs de campagne, cumò dal dut mudâts: il vert dai prâts e dai arbui traviersât dai pilons e des cabinis eletrichis, simbul precoç de industrializazion seguitive. A Curtiel si podaran amirâ lis oparis dal Neorealisim madûr, dispès cui dissens preparatoris, che a mostrin ancje i mistîrs contadins di une volte: des spiuladressis ai cjaçadôrs noturnis di crots, ai oseladôrs. A Udin, te glesie di Sant Antoni, e je esponude une trentine di dissens preparatoris par ramadis, che a costituissin une part impuartante de ativitât plui resinte dal mestri. Achì al ven fûr il teme de lûs, che al devente forme simboliche, simbul di sperance, insiemi al recupar di iconografiis antighis di sants.
Tal timp, Poz si è slontanât de rapresentazion de realtât par marcâ contignûts simbolics, che però a son simpri dongje dal mont contadin. I significâts simbolics dal nît, dal soreli, dai baraçs, de lûs e de ombrene, a son, di fat, alegoriis pervadudis de osservazion de nature.
Erika Adami