Novembar al scomence cu lis zornadis dai Sants e dai muarts, che te nestre tradizion di seculoruns a jerin di riflession, ricuart, preiere, silenzi, ma a riscjo di jessi splantadis di une fieste plui banâl e comerciâl come chê di Halloween. Subit dopo di chestis zornadis e je stade metude sù la fieste dai 4 che e ricuarde la fin de I vuere mondiâl. Ce tante retoriche che si à doprade par memoreâ i tancj muarts in vuere. Salacor unic sisteme par taponâ i disastris che ogni vuere e puarte cun se.
In merit a lis tantis ricorencis sglonfadis plui dal dovût a lis tantis bufulis che si sintarà ancje in cont dal 150esim de unitât di Italie o presentìn chestis considerazions che nus lasse pre Antoni cu la sô solite clarece e francjece.
pre Roman Michelotti
Storie e storiis
Publicade su La Vita Cattolica ai 10.11.2001
La Italie e je une republiche democratiche fondade sul lavôr. Al è il prin articul de costituzion. Cjalant l’esercit dai disocupâts, o si gambie la situazion o si gambie la costituzion. A pat che no cjapìn ancje il test di fonde come un mût di dî. E al vignarès propit di pensâlu se si cjale altris articui basilârs, come il sîs, chel des minorancis, ancjemò tal mont de lune come aplicazion.
E ce dî dal articul 11, chel che al ripudie la vuere, e di Berlusconi e dute la sô congreghe di centri-gjestre che a batin fûc e flamis par intervignî cu lis armis inte «mission» cuintri dal terorist Osama bin Laden, par vê un puest in prime linie, par rifâsi une virgjinitât denant dai americans e dai inglês, come che îr Mussolini al domandave almancul 5000 soldâts muarts par podê sentâsi a spartî i beneficis de vitorie?
Se la fonde e je cussì clopadice, inmagjinâsi il rest!
Mi ven il scrupul che dute la struture e sedi fate sù su la mitologjie, su la falsetât storiche, su lis bufulis oleografichis, su la retoriche e che la nestre storie resint e viere e sedi fate di storiis. Mil bausiis no fasin la veretât e mil storiis no fasin la storie. E la storie cence fonde no ten in timp normâl e tant mancul in timps come i nestris. Ancje cirint di punturâ dut cun gnove retoriche, come che si sta fasint ancje al nivel plui alt.
O vin a pene celebrât il fatidic 4 di Novembar, zornade consacrade a la grande vitorie de Grande Vuere, che in realtât al è stât un armistizi dopo cuatri agns di un stragjo inutil, che nus à jemplâts di muarts, di miserie e di monuments e al à preparât il teren velenât pal secont conflit, inmò plui disastrôs e injustificabil. Onestât e serietât e volarès che cheste zornade e deventàs une zornade di penitince, di esam di cussience, di rivisitazion des causis di tante matetât plui che di celebrazions di une glorie inesistent. Propit par onorâ i muarts, par che il lôr sanc al servissi a alc e a sedin i ultins. Mi plasarès che ogni monument al fos un amoniment, là che si fermisi a rifleti, a vaî. Cidins e cul cjâf bas.
La zornade celebrative le àn dedicade a la unitât nazionâl. Un teme impuartant, se vivût in maniere juste; periculôs se al devente ocasion di altre retoriche e di altris mitologjiis. Personalmentri mi varès plasût che si batès di plui sul federalisim, che nol è mancul impuartant de unitât e al è plui rispietôs de storie e de vocazion culturâl dai popui che a son in Italie. Che si ves la onestât di rivisitâ dut chest secul e mieç, cjalant cence parevôi e contant lis robis come che a son ladis, cun debits e credits, par cjatâ une fonde reâl, umil, sclete, vere, che e tegni.
Biel che o jeri in vacance sul Gargan, mi soi intivât intun siôr di Milan che al cognosseve la nestre regjon. Mi à contât che al è stât a Cjaurêt, a visitâ l’Ossari. Une visite comovent. «Ma il dolore più acuto l’ho provato quando ho letto sulla segnaletica il nome santo di Caporetto ribattezzato dagli Slavi in Kobarid. Un autentico sacrilegio!».
O ai cirût di spiegâi che il sacrilegjo lu vevin fat i talians e che i slovens a vevin dome tornât a meti chel non che al è simpri stât. Mi à cjalât di svuec e mi à dit che no ai sens civic e morâl e nissun rispiet pai muarts. Probabilmentri lu diseve in buine fede, parcè che lu vevin imbroiât a scuele. Si puedial onorâ i muarts contant bausiis? Si puedial onorâ la storie contant storiis? Si puedial fâ la gjeografie spostant i confins e inventant nazionalitâts mai esistudis? Aial sens dâ une medaie pe resistence a Zara, che no je mai stade taliane ma in câs venite, vierzint feridis profondis te memorie di altris popui? Dutis domandis di fâsi almancul in chescj dîs di rimembrance.
PRE ANTONI BELINE
(L)Int Autonomiste / Al esam di maturitât cu lis dispensis sul nestri sît
Dree Valcic
✽✽ E je une grande buse intal percors che planc a planc al è daûr a fâ l’insegnament de lenghe furlane inte scuele. Plui che une buse o podaressin definîlu un gorc che al va a pericul di gloti ducj chei si movin in chest setôr fondamentâl de nestre culture identitarie.✽✽ Si cjatìn di fat […] lei di plui +
L'Editoriâl / Risierve di valôr
Leonardo Giavedoni - Buenos Aires
In ciertis tribûs o tes grandis fameis il cjâf grup al vignive nomenât patriarcje. Di solit e jere la persone plui anziane, une vuide naturâl. invezit, tal mont religjôs, in particolâr tal Orient Cristian, il patriarcje al jere un primât eclesiastic poiât su facoltâts e prerogativis che i davin une posizion di supremazie tes glesiis […] lei di plui +
Salon Internazionâl dal Libri di Turin 2023
Redazion
La Patrie dal Friûl e je presinte pe seconde volte tal Salon Internazionâl dal Libri di Turin cul so mensîl, l’unic in leghe furlane e cu la sô golaine “La machine dal timp” che e vegnarà presentade vuê joibe ai 18 di Mai aes 5 sore sere tal stand istituzionâl de Regjon Friûl – Vignesie […] lei di plui +
COROT. Nus à lassâts Sergio Salvi
Redazion
Domenie ai 23 di Avrîl, a la etât di 90 agns, nus à lassâts Sergio Salvi, un grant amì de lenghe furlane e di dutis lis lenghis minorizadis. «Scrittore, poeta, storico delle lingue minoritarie» lu definìs la Wikipedia taliane, al è stât chel che par prin al à jevât su il vêl su la cuestion […] lei di plui +
Vuê al è il 3 di Avrîl, si fâs la Fieste de Patrie. Fûr la bandiere dal Friûl! Mandi a ducj i furlans! Buine Fieste de Patrie!
............
Chest an si davuelç ai 16 dal mês la celebrazion che e memoree l’inovâl dai 946 agns de nassite dal Stât Patriarcjâl 3 di Avrîl dal 1077: une date fondamentâl pe origjin de nestre identitât di popul furlan, dal moment che propit cheste zornade e je considerade in maniere uficiâl tant che chê de nassite […] lei di plui +
Glesie Furlane / Grop amîs di pre Toni. Program dai events pal 2023
1) Vinars ai 21 di Avrîl a lis 20.30, inte Sale Riunions di Vile Zamparo a Basilian, presentazion de gnove edizion dal libri di pre Toni “Fantasticant”.Relatôr: Roberto Iacovissi.In colaborazion cun Glesie Furlane.2) Sabide ai 22 di Avrîl, a lis 3 e mieze dopomisdì, in vie Friuli a Visepente, “5e Cjaminade libare – Pai trois […] lei di plui +