Sfuei Mensîl Furlan Indipendent
Archivi de Patrie

ATUALITÂT – Tancj bogns propuesits a fasin sperâ…

............

La Filologjiche e à celebrât a San Vît dal Tiliment
il so congrès numar 87: une ocasion di plui par afermâ che ancje il Friûl di là da la aghe al sburte pe difese de culture e pe tutele de lenghe furlane. La citadine dulà che Pier Paolo Pasolini al à vût publicât il so «Stroligut» e à viert lis sôs puartis pe tierce volte ae Filologjiche, daspò dai congrès dal 1937 e dal 1973. Il president Lorenzo Pelizzo al à fat un belanç de ativitât de associazion ma soredut des ativitâts dutis che a van a promovi la pratiche dal ûs dal furlan. Ativitâts che la crisi e fâs vignî mancul in tancj setôrs e che a somein sburtâ a jessi pessimiscj. Lis conclusions dal congrès dut câs no son cussì neris. L’assessôr  Roberto Molinaro al à pandût la sô gjonde par vê finalmentri podût impegnâ la Rai sul teren concret de aplicazion de leç 482/99 dant sigurece che i programs par furlan a vignaran realizâts in curt. Nuie al è stât dit, purtrop, di chês altris realtâts de emitence, chês privadis, che i son stâts taiâts ducj i finanziaments: pecjât. Molinaro al à invezit laudât lis associazions che a puartin indevant distès, ancje cence grancj jutoris, la tutele de marilenghe.
IL FESTIVAL, AIAR GNÛF_L’assessôr al à dit che l’esempli plui biel de «sêt» di furlan che e je tes zovinis gjernaziis al è par so cont il sucès dal Festival de Cjançon Furlane dulà che tancj che a cjantavin, tancj che a jerin alì a viodi e tancj autôrs des cjantis in gare a vevin mancul di 30 agns. Par chest par lui al è fondamentâl dâ aplicazion ai programs di insegnament tes scuelis, e cumò si è dâur a prontâ un regolament di pueste. Otimist ancje il senatôr Mario Pittoni che al à fevelât de dibisugne di formatôrs che e je te scuele: e chest al clame in cause l’Universitât par vie de situazion di sotfinanziament che e varès di jessi ricalibrade di un gnûf sisteme di valutazion dai ateneus. Pelizzo al à dut câs fat un apel ae retore de Universitât dal Friûl Cristiana Compagno parcè che a vegnin rinfuarçâts i organics dal Cirf, il Centri interdipartimentâl per ricercje su la lenghe e la culture furlane. Difat di cuant che il professôr Zuan Frau al è lât in pension a son dome la professore Piera Rizzolatti e il dotôr Federico Vicario a puartâ indevant lis ativitâts in chest setôr. «Stant che o savìn ducj dai sfuarçs che e à fat par puartâ in ecuilibri il belanç – al à dit Pelizzo – i domandìn dut câs di no penalizâ il setôr dal furlan, ma di cirî di reintegrâ i organics par davuelzi simpri miôr la funzion di Universitât dal Friûl».
Walter Tomada

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +