ATUALITÂT – La seconde scuadre furlane plui adalt

Un câs che al infuartìs il leam dal mandament di Puart cul Friûl: la scuadre di balon de capitâl dal mandament – il Portogruaro – ospite dal stadi Friûl pes primis partidis dal campionât. Il fat al è sucedût par vie che l’implant dulà che al zuie il Puart – il stadi “Mecchia”- al à di jessi metût a puest par vê la omologazion al campionât di B, daûr dai criteris dai decrets Pisanu su la sigurece. La spese proviodude e je sù par jù di 1,5 milions di euros.
Il stadi Friuli al à puartât fortune ae scuadre, che e à otignût trê vitoriis tes primis trê partidis dal campionât, prime di inçopedâsi cul Novara, cuntune sconfite penze (1-5).
LIS ORIGJINS_ La storie dal Puart e tache dal 1919 cuant che e nassè la Associazione Calcio Portogruaro. Tal 1990, la socie di Puart e à decidût di fondisi cu la Associazione Calcio Summaga fasint sù il Calcio Portogruaro Summaga. Si decidè di puartâ indevant la tradizion dal  Portogruaro, confermant i siei storics colôrs granade, ma il non coret de scuadre al varès di jessi Portosummaga.
LA IMPRESE_ Te stagjon stade la scuadre e à otignût il risultât storic de promozion in B, cu la vitorie decisive te ultime zornade tal stadi Bentegodi, in cjase dal favorît Hellas Verona, cuntun gol al otantenovesim minût. Un travuart che al è piturât di Friûl ancje chel: l’alenadôr e il preparadôr dai granade a jerin Calori e Turci, vecjis bandieris de Udinese.
L’inizi di cheste stagjon al è stât un pôc tormentât, cul gnûf alenadôr Corini e il diretôr sportîf  Magalini che si son dimetûts par contrascj cu la societât. Al puest di Corini cumò al vuide la scuadre Fabio Viviani, 43 agns.
No cate chescj problemis, al è stât un bon inizi di campionât pe matricule granade (il colôr sociâl des maiis) che si è confermade tant che biele sorprese, pûr jessint la scuadre di une vile di uns 25.000 di lôr. Par nô, la seconde scuadre plui impuartante dal Friûl.
DREE VENIER