ATUALITÂT – Cuant che i furlans a deventin isontins e julians

Il «Dizionario biografico dei giuliani, fiumani e dalmati» al fâs fevelâ di se in chescj dîs daspò jessi stât mandât fûr tal 2009 a Gurize de «Associazione nazionale Venezia Giulia e Dalmazia» e des «Edizioni della Laguna».
A tirâ la atenzion sul volum tai dîs passâts al è stât Gianni Nazzi, de Clape culturâl Aquilee, restât scaturît par vie che jenfri i “julians” a son stâts ingaiâts une schirie di furlans doc, che Nazzi ju à individuâts un par un: Gian Giuseppe Bosizio (1660-1743) che al voltà la Eneide di Virgilio par furlan, Pietro Zorutti (1792-1867); il gradiscjan Federico de Commelli (1826-1892) che, al ricuarde Nazzi, al fo il prin a doprâ la denominazion “Friuli Orientale” par dî “Friuli Isontino” e il poete Celso Macor di Romans dal Lusinç. Tal Dizionari a son stâts metûts dentri ancje E.Bearzot, F.Capello, R. Carrara, P.Cocolin, H.Kitzmaeller, G. Maghet, I. Mazzon, V. Pieri, F. Spessot, M. Strassoldo, L. Tavano, D. Zoff e altris ancjemò.
Par Nazzi, une vere opare di “julianizazion”, biel che ai timps di Bosizio e di Zorutti la peraule “julian” nancje no jere, jessint jentrade tal vocabolari tal 1863 al seguit de Vignesie Julie. Duncje, al conteste, “tal Friûl Isontin aromai no si pues plui jessi furlans ma dome julians, tal rest dal Friûl dome friul-julians. E in curt – al siere – di chest pas al vignarà mancul ancje il prin tiermin dal binomi”.
E je rivade subit la repliche di Roberto Ziberna, president de clape che e à mandât fûr il Dizionari, dulà che la peraule clâf par sclarî la sielte, dal so pont di viste e je “Isontino”. Te jentrade dal Dizionari, al spieghe di fat Ziberna, si è zontât a lis notis biografichis dai istrians, flumans e dalmatis “i nons plui significatîfs ancje dal Isontin e di Triest che prime no jerin. Stant che ducj i furlans nomenâts di Nazzi a son nassûts tal Isontin – al zonte – a son stâts metûts dentri a plen titul te opare”.
Motivazions che forsit no contentaran e par plui motîfs: ce che al reste tal letôr a son i titui, plui che lis “jentradis” ai volums. E po, stant che i “isontins” innomenâts a son furlans, par clarece forsit al valarès la pene clamâju cul lôr non.
Antonella Lanfrit