Sfuei Mensîl Furlan Indipendent
Archivi de Patrie

ATUALITÂT – Gnognocolôrs, saurs di colorâ

............

«Parcè i Gnognosaurs a Fiumettopoli? Parcè che a son une idee splendide!» cussì al comente sclet Claudio Carlot, organizadôr di Fiumettopoli (www.fiumettopoli.it), la fieste dal fumut di Vildiflum (Pn), rivade a la setime edizion, cressude an dopo an deventant il festival regjonâl di riferiment. Tra i nons invidâts a son il gurizan Andrea Castellan, cognossût cul non di «Casty», dissegnadôr e senegjatôr di Cattivik e cumò de Disney, vincidôr tal 2006 dal Premi «Fumo di china» tant che miôr senegjatôr umoristic talian; il dissegnadôr di Tex, Andrea Venturi, e par finî Claudio Nizzi, pari di tancj personaçs par «Il Giornalino» (Larry Yuma, Capitan Erik, Piccolo Dente, Nicoletta) cumò al lavore par Tex.
«O pensìn che Dree Venier al sedi une vore coragjôs» al continue Carlot «e cussì o vin contatât l’editôr Orazio Cantiello: e je la prime volte che o puartìn un progjet di lenghe furlane a Vildiflum, cun chê di valorizâ ancje la produzion dal teritori».
Ma la «gnognognove» di chest an e je dople: a son di colorâ e a son bilengâi. «Talian/furlan?» si domandarà cualchidun: «No!» i ten a marcâ «il papà dai Gnognosaurs» «chel o soi jo… I Gnognosaurs a son bilengâi sì, ma par furlan e par inglês! Dopo dal Friûl o sin partîts a la concuiste des Americhis!». Ancje la impostazion e je inovative, no dome dal pont di viste de sielte des lenghis: il volumut (presit: 2,90 euros) al pues jessi zirât e voltât di ogni bande intant che si lu colore e al pues jessi let sedi par furlan e par inglês parcè che lis dôs lenghis a àn stesse dignitât su la taule. La cjase editore «L’Omino Rosso» di Pordenon e à viert une sede ancje pai Stâts Unîts e il Canadà e si augure di podê dopleâ il sucès dal prin libri dai Gnognosaurs jessût tal Dicembar dal 2009. Cheste e je gnove dal Autun, ma no sin son nancje fermadis lis aghis che za Orazio Cantiello al rilancie «La prime edizion le vin cuasi dal dut finide» al precise l’editôr «nol passarà tant timp part tornâ a viodi su lis scansiis de librariis». No stentìn a crodi che ancje chest colp al sarà un sucès, stant che la esperience e insegne che e je tante gole di chescj dinosauruts nassûts dal lapis di Dree Venier (classe 1967, di agns ilustradôr e za diretôr da La Patrie dal Friûl).
I Gnognosaurs, furlans cul balin de modernitât, a continuin a scrivi ancje un blog par furlan: www.gnognosaurs.blogspot.com dulà che si puedin lei lis ultimis novitâts dai nestris erois.

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +