ATUALITÂT – Une gnove ostarie par… sintîsi in Patrie

Ai 17 di Otubar dal 1797 Napoleon al firmave il tratât di Cjampfuarmit.
Te stesse dì a lis cinc soresere, ma 213 agns dopo a Cjampfuarmit, in place dal Municipi, e sarà la cerimonie di scree di une gnove ostarie cun cusine e cjamaris, che il so ideatôr al à volût clamâ «La Patrie dal Friûl».
Come che nus conte cun braure Oscar Olivo «Al è un sium, un volê tignî dûr parcè che i furlans a podedin mangjâ e bevi par furlan, ma ancje vê un puest dulà fevelâ di Patrie e respirâ Friûl».
E chest al è propit ce che si sint za dome cjalantle di difûr, dulà che su la parêt ad alt a son di une bande la Bandiere dal Friûl e di chê altre la crôs di Aquilee.
Jentrant te prime sale la storie dal Patriarcjât di Aquilee e je scrite su lis parêts. Ma no je finide: te seconde sale a son stâts piturâts, sot dal cjant de Filologjiche, ducj i stemis dai comuns dal Friûl storic «Ma o ai za ordenât ancje chei di Sapade e Cint e sot ur scrivarai: «Us spietìn!»».
Oscar al à coinvolt ta cheste imprese ancje la fie Elena e il zinar Luciano (ducj i doi a àn lassât un puest sigûr: jê di infermiere e lui di carabinîr), gjestôrs de ostarie.
A la domande dal parcè de date de inaugurazion Oscar al rispuint sclet «E je une rivincite parcè che ta chê date tancj a pensavin che il Friûl al fos muart e invezit o sin ancjemò chi e lu sarìn par tant timp, ancje se, magari cussì no, i tancj parons che a àn balinât di chestis bandis no nus àn tratât cuissà ce ben, massime la Italie».
La cusine e je gjenuine e ancje lis 2 cjamaris a dan chel sens di calôr di cjase, ancje pal furniment antîc e restaurât, che lis insiore. In taule si pues gjoldi dai savôrs di dut il Friûl «Che o voi a cirî un par un» al precise Oscar. Ma l’ingredient che al fâs la difarence al è il Friûl «La nestre e je une ostarie che e à di savê di «cjase», une cjase pai furlans ancje di chei che a tornin par cualchi zornade e che chi a àn di vê la pussibilitât di cerçâ il gust dai nestris prodots e sintî di jessi in Patrie» al conte Oscar «La ativitât si è inviade ben e la nestre maniere di fâ e je preseade ancje di chei che no son furlans, che nus domandin spiegazions su la nestre lenghe, su la nestre storie che e je scrite un pôc pardut chi dentri: e a tornin cun plasê». Prime di saludâsi, Oscar, di bon furlan, nol sparagne un amoniment «O ai di finî di netâlu, ma dopo lu picjarâi ancje chel…» nus conte cuntun tic di misteri «O ai cjatât un biel toc di anticuariât: lu metarai in biele viste cuntune scrite par ricuardâ: «lu vin ancjemò…». Al è un jôf dal 1741 che Oscar al volarès che i furlans a podedin deliberâsi in curt di lui.
Christian Romanini
___________________________________________________________________
La ostarie «La Patrie dal Friûl» e je vierte cun chest orari: 10.00-14.30 e 17.30-24.00. Zornade di polse il martars e si le cjate in place a Cjampfuarmit di front dal Municipi (tel. 0432-632116).