ATUALITÂT – L’ûs veicolâr par sostignî lis nestris diviersitâts linguistichis

Sotliniât il concet che “la diviersitât linguistiche e rapresente un element di culture e di democrazie”, il diretôr gjenerâl dal Ufici scolastic regjonâl, Daniela Beltrame, e met in clâr che bielzà il ministeri de Istruzion (Direzion gjenerâl par i ordenaments de scuele) tal 2008 al à fat so une des inovazions metodologjichis europeanis tal insegnament des lenghis, metint te Circolâr n. 64 dal mês di Lui dal 2008 un riferiment precîs al aprendiment integrât de lenghe a scuele (Clil). Si trate di “un passaç impuartant dal pont di viste normatîf” e dîs Beltrame, che al è stât rinfuarcît cu la Circolâr 70 dal Lui dal 2009.
La Circolâr 64/2008 e propon ae scuele, dutun cun ce che al è scrit te leç regjonâl 29/2007, il metodi Clil (Content and language integrated learning), che al è un grum doprât tai paîs europeans, sei te scuelute, sei tes elementârs e tes mediis, par che i arlêfs a imparin la lenghe mancul pandude e lis lenghis europeanis. “Il metodi di insegnament di une materie in lenghe, metint adun la lenghe cul contignût – e spieghe Beltrame –, al à permetût di frontâ materiis scolastichis in forme gnove, origjinâl e plui golose par i students”.
FÂ VIVI UNE LENGHE CUL CLIL_L’ûs veicolâr e contestuâl de lenghe furlane par l’insegnament di contignûts dal curriculum, come storie, gjeografie, materiis sientifichis, che si è fat in cualchi scuele “al à dimostrât – e sotlinie Beltrame – che al è pussibil mudâ la stesse lenghe storiche intune lenghe vive”. Cun chest metodi, e zonte, “no si impare dome a doprâ la lenghe, ma si dopre la lenghe par imparâ. E si dopre la lenghe in forme significative e no in riferiment a condizions gjenerâls (come fevelâ dal timp o fâ fente di lâ al ristorant), come che si fâs par l’insegnament des lenghis forestis”.
Seont il diretôr Beltrame, duncje, dut chest “al rapresente, dal sigûr, un teren didatic di mediazion par sostignî lis nestris diviersitâts linguistichis”.
Antonella Lanfrit