VISIONS – GALARIE FOTOGRAFICHE. SUNS 2010 la Europe e sune a Udin

R.Esistence in Dub a concuistin il public di Suns 2010 e il vôt popolâr ju mande drets a Lorient in Bretagne dulà che si tignarà la finâl dal Liet International, il festival de musiche in lenghe minoritarie che chest an pe seconde volte di file al à vude une semifinâl ancje a Udin, intun Palamostre plen di int. La jurie tecniche e à invezit premiât il cors Stefan Casalta (secondis lis ladinis Ganes e tierç puest pai ocitans Lou Seriol). A son restâts fûr i furlans Pantan, che però a àn confermât la lôr valence cuntune esibizion pardabon fuarte.
Dal sigûr no varessin volût cjatâsi te comission parcè che il nivel di cheste edizion al è stât une vore alt, come che si à podût ancje sintî dai esperts e de partecipazion dal public che al à preseât ducj i artiscj che si son esibîts sabide ai 28 di Avost. Di ricuardâ ancje la esibizion di Glauco Venier, ospit di ecezion.
E il prossim an, la organizazion vuidade de Arlef (Agjenzie Regjonâl pe Lenghe Furlane) adun cul Comun e la Provincie di Udine, la cooperative Il Campo e Radio Onde Furlane e darà acet a la finâl europeane.
(Redazion)