ATUALITÂT – Viers un gnûf model di formazion

Il patrimoni linguistic de nestre regjon al sarà di gnûf protagonist di un apontament internazionâl dulà si cjataran denant diviersis realtâts europeanis. Teme dal incuintri al sarà chest colp l’insegnament des lenghis e si davuelzarà ai prins di Setembar.
O vin contatade la prof.e Silvana Schiavi Fachin, presidente dal Centri internazionâl sul plurilinguisim de Universitât dal Friûl e esperte di didatiche des lenghis.
Ce isal l’Eunom?
«Il progjet trienâl ( 2009 – 2012 ) EUNoM (Rêt europeane di universitâts sul multilinguisim) al à come obietîf di meti in lûs lis relazions complessis tra il fenomen sociâl de diviersitât linguistiche, la economie de cognossince e de comunicazion e une educazion plurilengâl che a rispuindi in maniere efetive a lis dibisugnis di competence in plui lenghis dai citadins di ogni etât tal mont globalizât.
Cui sono i ents che a lavorin su cheste iniziative?
«Il progjet al met adun un piçul grup di universitâts e centris di ricercje – la Universitat Oberta de Catalunya; la Queen’s University di Belfast; la Fryske Akademy in Frisie; la Primorska University / Università del Litorale, Koper/Cjaudistrie; la Erasmushogenschool , Brussels; il Centre for European Research, Bangor, Wales e il Centri Internazionâl sul Plurilinguisim de Universitât dal Friûl e un grup plui larc di colaboradôrs che al cjape dentri altris 31 istituzions di 15 stâts de Europe plui la Turchie: ES-IT-BE-DE-SI-UK-NE-HU-BG-IE-RO-SK-EE-SV-FI-TK».
Cualis azions sono programadis?
«Si propon di organizâ dôs cunvignis par an sui argoments plui cjalts e sui ponts plui critics come la ricercje e la formazion universitarie; la gjestion des societâts e des istituzions multilengâls e multietnics; il multilinguisim te societât de cognossince e il marcjât dal lavôr; TIC (tecnologje informatiche ), e-learning e lenghis e l’ultin che si fasarà a Brussels, li de Comission Europeane, su lis gnovis prospetivis de politiche linguistiche».
Cuâl isal il calendari des cunvignis?
«La prime cunvigne e je in program a Udin te Sale des Cunvignis di Palaç Antonini, martars ai 7 di Setembar (dute la zornade, a partî des 9.30) e Miercus 8, des 9.30 ae 1.30 di dopomisdì. Esperts di innomine a fevelaran sui problemis de preparazion dai insegnants di lenghis nativis (minoritariis), secondis e forestis».
Par plui informazions, il program si pues cjatâlu sul sît di EUNoM : http://eunom.uoc.edu, telefonant al Centri Interdipartimentâl pal Plurilinguisim: 0432 556460 o scrivint a barbara.villalta@amm.uniud.it. Si metaran a disposizion lis traduzions dai strucs e, pes relazions in lenghe foreste, e sarà a disposizion la traduzion simultanie.
Redazion