ATUALITÂT – Chê messe a Aquilee

Messe grande, simpri plui grande, inte basiliche di Aquilee pe ricorence dai Ss. Ermacure e Fortunât, chest an ricuardâts di Glesie Furlane te domenie dai 18 di Lui. Come ogni an si rinove di fat la volontât di ricuardâ te basiliche mari i nestris sants protetôrs che di secui incà a veglin sul Friûl. Cjants e messâl, dut par furlan, par sintîsi inmò plui dongje te solenitât de liturgjie a lis nestris lidrîs plui profondis, cuant che fin dal imprin, intun cristianisim inmò fresc ma za vigorôs, ta chescj mûrs secolârs a rivocavin lis preieris dai nestris vons ta chê lenghe che e jere espression di une vite leade sì al imperi dilagant, ma che e cjapave forme e identitât proprie. E vuê, ben cussients di trop timp che al è passât, sintî chês preieris e chei cjants intune lenghe inmò nestre, dilà di dut, al fâs capî cetant impuartant che al è mantignîle vive e fuarte.
OGNI AN SIMPRI DI PLUI_ Messe simpri plui grande si diseve, parcè che a ogni an che al passe si zontin simpri plui fedêi che a riscuvierzin lis lôr olmis, in graciis ancje di cheste solenitât dulà che, insiemi al grup di celebrants, si fasin dongje ancje int comune, autoritâts… e forescj. Tancj di fat a son i visitadôrs che a rivin te citât di Aquilee par riscuvierzi il so passât, midiant i museus, i sgjâfs, lis rapresentazions storichis, ma ancje in chescj moments di riflession. Int che e preave insiemi ai furlans, ancje se no capive trop dute la liturgjie, ma che tal moment di recitâ il Pari Nestri nol à coventât savê nissune fevele, se no chê dal cûr. Int ancje che, cjalantsi ator e scuadrant ogni cjanton de basiliche, si divertive a scoltâ chei predicjadôrs fevelâ intun mût strani, come se a fossin daûr a assisti a un spetacul gnûf, «folcloristic», sbeleant i sants e i vîfs. Dal cûr alore al è vignût fûr un messaç, che Cualchidun al à mandât, par berlâlu a fuart, e par che a fuart lu vessin sintût: «il Signôr al fevele ancje par furlan, puartaitnus rispiet». Lu àn puartât, lant daûr dai insegnaments di Crist, voltantsi par ufrî chel segn di pâs che nus rint ducj fradis, dilà de lenghe e dilà de tiere.
LA PRESENTAZION DAL NUMAR DE “PATRIE”_ Segn di sperance al è rivât ancje plui tart tal dedicât a la presentazion dal ultin numar de «La Patrie dal Friûl», cui intervents dal nestri diretôr Dree Valcic e dal redatôr Christian Romanini. Li dal ristorant ai «Patriarchi» pe prime volte in cheste ocasion si son cjatadis dongje dutis trê lis rapresentancis politichis teritoriâls: chê comunâl te vieste dal sindic di Aquilee Alviano Scarel, chê provinciâl cul president Pietro Fontanini e pe Regjon l’assessôr aes Risorsis agriculis, naturâls e forestâls Claudio Violino. Ducj insiemi a àn pandût la volontât e l’auspici di continuâ a puartâ indevant la rinassite dai vêrs valôrs furlans, partint ancje de riscuvierte des nestris lidrîs cristianis.
Venusia Dominici