Il grant esempli di Rino Cozzarin “Favri”,
che al à metût adun e paiât di sô sachete
un vocabolari di oltri sîscent pagjinis
e cuindis mil tiermins
Si fâs fature a jessi furlans in gjenerâl e inmò di plui sui ôrs de furlanetât. Tra chescj a son sigûr chei che a vivin a soreli a mont e, soredut, pai oms di culture. Cui che, nassût sul confin, si impegne pe culture furlane e che di li al propon la sô opare, al cor un risi dopli. Di no jessi preseât come che al merete ni dai siei paisans, ni dal rest dai furlans. Sul imprin, al à vivût chest passaç parfin Pier Paolo Pasolini che, po dopo, al fasè viodi a ducj di ce paste che al jere fat. Leterâts, scritôrs, poetis, artiscj e studiôs a son simpri stâts ancje a soreli a mont, ma a àn simpri fat fature a fâsi cognossi adiriture a cjase lôr e inmò di plui tal rest dal Friûl. Se po un nol à i titui e i apuestui juscj, la imprese e je… titaniche. A Cordenons al è un esempli “di scuele”, come che si dîs, di un grant apassionât e studiôs de lenghe e culture furlane (locâl) che al meretarès plui atenzion di ce che al à vude fin cumò. Si trate di Rino Cozzarin “Favri”. Cheste, in struc, e je la sô storie.
◆ A Cordenons, di passe cincuante agns al è atîf une des clapis plui vivarosis pe promozion de culture furlane: il “Gruppo Cordenonese del Ciavedal”, fondât tal 1975 di Renato Appi e di tancj altris, apont, par mantignì vivis la lenghe e la culture locâl tignintle peade ae marilenghe e ae Patrie dal Friûl. Tai prins agns dal gnûf secul, cu la presidence di Lucio Roncali, il grup al inmaneave une schirie di ativitâts: al publicave une riviste, libris, al tignive conferencis, incuintris, concierts, la messe par furlan par memoreâ il patriarcje Beltram, cul Comun e la Provincie al organizave il premi di culture furlane in onôr di Renato Appi che al jere mancjât tai prins agns ’90 e vie indenant. Tal 2005, une biele dì, e ven fûr sui cuotidians furlans (par mût di dî) la gnove: Il cordenonês Rino Cozzarin al da ae stampe il “Vocabolariu par Cordenons”, cun plui di 600 pagjinis e passe 15.000 lemis. In pratiche il plui grant dizionari par une sole variante dal furlan. Par grandece e implant, si pues metilu dongje dai storics dizionaris Pirona, Marchetti e dal Faggin. Dizionaris, chescj, che parie aes gramatichis a son stâts par agns, lu scuvierzerin daspò, i compagns di vite di Rino. Intant, però, scuasit nissun al cognosseve Cozzarin e nancje i sorestants dal Ciavedal – custodis dal “folpo”, il furlan di chenti, come che o vin dit – a savevin ce che al jere daûr a fâ.
◆ Dome dopo cheste sorprese, lu clamarin e i derin il puest che al meretave inte clape. Di in chê volte Rino “Favri” al è deventât “il mestri” e al à tignût cetancj cors di “folpo” a desenis di cordenonês e no dome; al à scrit desenis di articui pe riviste dal Ciavedal e, dopo dal Grant Vocabolariu, al à metût adun la version piçule e po la “Gramatica par Cordenons” e il libri – che ducj i furlans a varessin di lei – “L’arcan mito de li Furlani. Il Friulano quest’illustre sconosciuto”, mandâts fûr dal Gruppo del Ciavedal. No cate dut chest lavôr preziôs a pro de lenghe locâl e de culture furlane, Rino Cozzarin “Favri” al à vût mancul ricognossiments di ce che al merete. Al paie il presit di stâ sul confin, di tignî buine une variante, di jessi autodidat, di lavorâ cidin, di no dâ di comedon a nissun e paiâ di sachete. Un vêr furlan, Rino Cozzarin “Favri” di Cordenons. ❚
