La clape dal president Daniele Puntel
e à metût adun la Cope Friûl di balon, lis partidis de Selezion furlane cuintri Groenlande
e Sudtirôl e la FurlRun. E no je finide achì
Le Vierte de Associazion Sportive Furlane e je stade une vore impegnative pe clape dal president Daniele Puntel e dal vice president Gabriele Violino. Daspò vê metût adun la Selezion dal Friûl, che intal 2024, inte prime partecipazion, e à vinçût l’Europeada, il torneu internazionâl european risiervât aes scuadris des minorancis nazionâls e linguistichis ricognossudis de comunitât internazionâl, la ASF e je lade une vore indenant cu lis iniziativis.
◆ Pe prime volte si è zuiade la Cope Friûl, un gjenar di manifestazion di balon plui in piçul e peade al teritori furlan, dut câs cu la stesse braùre de Europeada. Ae fin dal mês di Mai, intal stadi di Manzan, si è zuiade la prime, storiche partide internazionâl cuintri la nazionâl de Groenlande. Un event che al è stât presentât e al è stât pardabon une ocasion di scambi culturâl e di determinazion sportive fra doi popui. Ai prins dal mês di Jugn, a Glemone, intun lûc iconic de storie furlane e no dome pal taramot dal 1976, lis selezions furlanis dai oms e des feminis a àn zuiât une gare amichevule cuintri lis scuadris dal Sudtirôl. E, ancjemò di plui, la FurlRun, une corse popolâr, no competitive, che ai 12 di Avrîl e je partide di Aquilee, la scune de nestre civiltât, e e à tocjât 26 teritoris comunâi, rivant a Glemone, daspò vê corût 120 chilometris cun cetant divertiment, musiche, iniziativis culturâls: dut par furlan.
_
President Daniele Puntel: no molais mai!
“No si fermìn. Lis sodisfazions vudis ae Europeada dal 2024 a son stadis une vore e o cirìn di puartâ indenant iniziativis par pandi la identitât furlane e la determinazion intal vignî ricognossûts pe nestre storie, la lenghe e lis prerogativis che o vin di secui. Massime il sport al pues jessi un ambit indulà che al è facil tirâ dentri ancje i plui zovins e i risultâts a son preseâts”.
_
Tachìn de FurlRun: cemût ise vignude fûr la idee?
“O sin partîts di Aquilee, indulà che a son lis nestris lidrîs storichis, e o sin rivâts a Glemone, là che cincuante agns indaûr un taramot al à sdrondenât une vore la nestre tiere e la nestre identitât. Inte disgracie di ducj i muarts e i problemis, il Friûl al à mostrât a dut il mont ce che e je la nestre fuarce intal tirâsi impins. Intal Paîs Basc si cor la Korrika, une stafete suntun percors di 2500 chilometris che e dure 11 dîs e che e unìs ducj i teritoris bascs: e covente a finanziâ l’insegnament de lenghe basche. La ispirazion le vin vude cjalant chê iniziative.”
_ Friûl cuintri Groenlande? “E je stade une ocasion storiche par nô. Il valôr simbolic de partide al va parsore dal ambit dome sportîf parcè che e je stade une oportunitât di scambi culturâl e di determinazion di popui. Il balon al fâs di adesîf pe lenghe e pe identitât. Si è viodût no dome intal cjamp di Manzan, ma ancje inte ocasion di acet uficiâl, in Municipi. O vin vût une vore di entusiasim intal passâ il timp cui amîs vignûts jù de Groenlande: sperin di rivâ a zuiâ ancje a cjase lôr, timp o tart”.
_
Selezion masculine e femenine cuintri il Sudtirôl?
“O vin une leande fuarte cul Sudtirôl, ancje par une cuistion di usancis: ancje lôr, come nô, a puartin indenant e a cirin di pandi il plui pussibil la identitât di un popul e di une culture dentri dai confins statâi talians, simpri cirint un confront cun culturis diviersis. Dal pont di viste sportîf, nus àn batûts sul cjamp, sedi cui oms, sedi cu lis feminis. Dut câs, o sperìn di rivâ a zuiâ cuintri di lôr une Super Cope fra la scuadre che e à vinçude la Cope Friûl e la scuadre dal Cornaiano che e à cjapade la Cope dal Sudtirôl, clamade Forst Cup”.
__
Juste apont: la ultime iniziative tirade fûr e je la Cope Friûl.
“La prime edizion, cun 13 scuadris, nus à dât cetantis sodisfazions. Ancje cuntune esposizion mediatiche impuartante parcè che o vin vût la filze di television, radio e web, tant che i zuiadôrs forsit no àn mai vût tante atenzion dai media. Biel cussì, e o cirin simpri di fâ miôr. Pal prossim an o sperin di tirâ dongje ancjemò plui scuadris, par rivâ a meti adun une competizion plui grande. O vin viodût tante int intes tribunis, segnâl che l’interès al è”. ❚
:::::::::::::::::::::::::::::::::::::::::::::::::::::::::::::::::::::::::::::::::::::::::::::
Il Colorêt al è la prime scuadre a vinci la Cope
I zovins di mister Comelli a àn vinçût
in finâl a Maian cuintri dal Manià
Il stadi di Maian al à ospitât, ai 2 di Jugn, la prime finâl de Cope Friûl – Trofeu Credifriuli, fra scuadris di Tierce categorie dal balon dal Friûl-Vignesie Julie che a fevelin furlan. Al à vinçût il Colorêt dal president Nicola Benedetto, cuintri il Manià dal president Andrea Bottecchia. Un 3-1 pe scuadre colôr granât, cul alenadôr Marco Comelli in bancjute e strissinade dal bomber Samuel Comelli, bule a tignî sot i aversariis colorâts di blanc e vert, vignûts di là da la Aghe cun cetante braùre cun chê di puartâ a cjase il prin trofeu. Par cualificâsi ae finâl, il Colorêt al veve batût il Listize par 2-0 in semifinâl e il Manià al à vinçût in trasfierte sul cjamp di Sante Marie la Lungje par 0-1. Lant a ledrôs, intai cuarts di finâl, vitorie par 1-2 dal Colorêt in cjase dal Puçui, tant che il Manià al à vinçût forsit la partide plui biele e di no crodi di dute la manifestazion. Un 11-10 in cjase, intal derby de Ciline cuintri la Vivarine, daspò dai tîrs di rigôr, par sierâ une gare finide sul 4-4 ai regolamentârs e sul 6-6 ai timps suplementârs. Ancje se no je rivade la Cope, insom de manifestazion il Manià si ricuardarà par sigûr di chê partide cu la Vivarine. ❚
::::::::::::::::::::::::::::::::::::::::::::::::::::::::::::::::::::::::::::::::
De Europeada dal 2024 ae sfide di Manzan cu la Groenlande: il respîr de clape al è simpri internazionâl
Une ocasion storiche di cognossi
une culture gnove cun cetante atenzion ae identitât ancje sportive
Friûl – Groenlande e je finide 5-0 pe scuadre dal mister Mauro Lizzi. Ducj chei che a àn fevelât de partide a àn massime tignût cont dal valôr culturâl e identitari de sfide fra dôs clapis che a doprin il lengaç dal sport e massime dal balon come adesîf par valorizâ une identitât. Intal 5-0 dai 31 di Mai, intal stadi di Manzan avodât a Angelo Morigi, il Friûl al à segnât il prin gol intal prin timp. Intal secont timp al à paronât, gjoldint di une partide zuiade une vore ben. Pe croniche: Lizzi, Del Fabbro, Costa, Cucchiaro e un auto gol dal portîr de Groenlande i marcjadôrs de partide di Manzan, che e je stade zuiade denant dal public des ocasions miôr: une dimostrazion che cuant che si fasin ben lis robis, ancje la int e rispuint di bot e cul cûr. ❚
