Furio Radin, difensôr dai Talians in Cravuazie, al salude il Parlament

Al à lassât il so puest tal Sabor (‘Parlament’ par cravuat) di Zagabrie dopo cuasi 34 agns di file tant che Deputât elet tal seç risiervât di pueste de Costituzion par un rapresentant de minorance taliane; cun di plui, tai ultins 9 agns al è stât ancje vicepresident dal Sabor, jessint stât l’unic parlamentâr presint dal 1992 incà par 10 elezions seguitivis. Ducj chescj numars a disin a clâr cui che al è Furio Radin, nassût 76 agns indaûr a Pole/Pula/Pola, lauree in Psicologjie (cun dotorât) te Universitât di Zagabrie, l’’incuilin’ plui storic dal Sabor jessint simpri stât elet tal ultin tierç di secul, dopo de indipendence dal Paîs tal 1991.
◆ Dilunc chest periodi, Radin al à viodût nassi e cressi la democrazie in Cravuazie, traviers guviers di centriçampe e di centridrete in cierts moments par nuie a pro des minorancis, li che tal Sabor a son in dut 8 seçs pai lôr deputâts (a son ancje serps, ongjarês, cecs, slovacs, rom e vie indevant). Vie pai agns, Radin al è rivât a fâsi preseâ pe sô capacitât di dialic e di fâ di mediatôr, mantignint un rapuart fuart cul Guvier di Rome cence cjalâ la sô posizion politiche, cu la Zonte de nestre regjon e cun chê dal Venit, fasint valê il leam storic che al pee ancjemò la cueste di Nordest e chê di Nordovest dal mâr Adriatic.
◆ Te suaze dal Sabor, Furio Radin al à fat oposizion par agns, po adun cui rapresentants di chês altris minorancis al è rivât adore a fâ aprovâ leçs une vore impuartantis pe incressite dai finanziaments statâi pes ativitâts des comunitâts talianis sparniçadis tal teritori, pal bilinguisim visîf te toponomastiche e tai uficis publics, pes scuelis in lenghe taliane e pal setôr de comunicazion. Magari cussì no, nol è rivât a vê il cussì clamât ‘dopli vôt etnic’ come in Slovenie, li che pal Parlament si vote par un candidât politic e par un de minorance, dut câs in Istrie e a Flum/Rijeka/Fiume a son za presints tai Conseis cetancj rapresentants talians.
◆ Radin al à fat domande di molâ il so seç “par cuistions personâls”. Il so puest al è stât cjapât di Marin Corva, 45 agns, elet di pôc ancje tant che president de Union taliane (che e cjape dentri dute la minorance in Cravuazie e in Slovenie), nomenât al puest di Radin par vie che al jere stât sielzût tant che suplent tes elezions parlamentârs dal Avrîl dal 2024. ❚