Autonomie de Corsiche, a Parîs al rive il prin “oui”

La strade e je ancjemò lungje e salacor complicade, ma par sigûr chel che al è stât fat ai 23 di Jugn stâts al è un pas impuartant, che al à une rilevance storiche. Cun di fat, intal prin martars dal Istât di chest an la Assemblée nationale, la cjamare basse dal parlament dal Stât francês, e à fat bon in prime leture il «Progjet di Leç costituzionâl par une Corsiche autonome inte suaze de Republiche».
◆ L’intindiment dal proviodiment al è chel di zontâ ae Costituzion un articul gnûf, il 72-5, là che si ricognòs a chê isule chê che si pues definîle une autonome specifiche e speciâl, dentri dal ordenament francês.
◆ Il test fat bon al ricognòs la Corsiche tant che «comunitât insulâr, storiche, linguistiche e culturâl» e al met in relazion direte la sô autonomie cun chel che al ven clamât «il leam particolâr cu la tiere corse». A son formulazions interessantis e impegnativis, massime se si ten cont de culture politiche che e segne la République, là che i riferiments a dimensions e a aspiets di caratar “identitari” e “specific” a fasin ancjemò plui fature che inaltrò a vê acet e ricognossiment.
◆ Al è propit par chel che e je cussì significative la sô aprovazion cun 271 vôt a pro, de bande de plui part dai deputâts dai grups de çampe, dal centriçampe e dal centri, tacant di La France Insoumise (LFI), dai Verts e dai Socialiscj e rivant fintremai a Ensemble pour la République (EPR), Les Démocrates, Horizons e Liot, là che si cjatin ancje i 41 astignûts, intant ducj i 202 deputâts dai grups de diestre – Rassemblement national (RN), Union des droites pour la République (UDR) e Droite républicaine (DR) – a àn votât cuintri.
◆ Cumò il test al passe ae valutazion e ae votazion dal Senât, che al probabil che i lavorarà parsore inte session de Sierade. Par che e ledi drete, ancje la cjamare alte e varès di fâlu bon cence nancje mudâi une virgule o une peraule, parcè che cun cualsisedi mende il progjet di leç al scugnarès tornâ indaûr inte aule di Palais Bourbon e vie idenant cussì. Cun di plui, dopo jessi stât fat bon compagn de bande di dutis dôs lis cjamaris, al varà di vê la convalide definitive de bande dai 3/5 di ducj i parlamentârs (deputâts e senatôrs) cuant che si daran dongje intune sentade comune (il Congrès) a Versailles.
◆ Par intant la sô prime aprovazion de bande de Assemblee e à vût il bon acet dal guvier, tacant de ministre pe gjestion dal teritori e pe decentralizazion, Françoise Gatel, che le à definide «une tape impuartante pe Corsiche e in gjenerâl pe nestre democrazie».
◆ Sodisfats ancje i esponents des fuarcis politichis autonomistis, tacant dal president di Régions et Peuples Solidaires (R&PS), il cors François Alfonsi, e dal deputât breton Paul Molac. Intun comunicât uficiâl R&PS e à palesât la sô posizion, marcant che «e je prin di dut une vitorie de Corsiche, dal so popul e dai siei rapresentants, che par une desene di agns a àn fat indenant cun indurance une iniziative politiche di cheste fate», ma ancje «di ducj chei che, cussients dal fat che il Stât francês al è fat di culturis e teritoris diferents, a son a pro di un procès di regjonalizazion che al tegni cont di cheste pluralitât e di cheste diversitât»: par chel il vôt di Palais Bourbon «al vierç une strade di sperance ancje par ducj chei altris teritoris», dal Paîs Basc ae Bretagne, des regjons ocitanis ae Alsazie, de Savoie ae Flandris dal sud e ae Catalogne dal nord.
Diferente la posizion dai indipendentiscj cors di Core in Fronte, che dongje dal ricognossiment de impuartance dal vôt de Assemblee a àn declarât di jessi mancul otimiscj par ce che al tocje la conclusion pardabon positive di chel percors. Viodarìn. ❚