Pulvin di stele e lat celest

Gnots di solstizi, di interconessions astrâls e di crodincis antighis che si vistissin di diviersis tradizions e usancis religjosis. Cun dutis lis sôs ricorincis, la fin di Jugn nus invide a resonâ sui leams jenfri il mont naturâl e chel spirituâl, cuntun voli pront a scrutinâ ce che si môf intal scûr e intal cîl.
◆ Darest, ancjemò prime di imparâ a stâ su doi pîts, l’om si è simpri domandât cuâl che al fos il sens de sô esistence, cirint confuart ta chês lûs lontanis che ogni sere a tornavin a impiâsi e a puartâ sperance e desideris. Desiderâ, di fat, al cjate la sô lidrîs propit intai astris, dal moment che il tiermin nus rive dal verp latin “siderare”, o ben “cjalâ cuntune vore di atenzion lis stelis”, cun chel “de” denant che nus ricuarde la mancjance te nestre vite – de persone o dal ogjet bramât, o ancje de perfezion. Par inglês o cjatìn “wish”, simil al cusin todesc “Wunsch”, che stant aes ricostruzions, a varessin la stesse lidrîs di Venus, la divinitât romane dal amôr e, juste apont, dal desideri, in dutis lis sôs formis. Se o cjalìn aes stelis, il tiermin “astrum” latin (che al rive dal “aster” grêc) al va a marcâ dutis chês lusutis “sparniçadis, spandudis” intal cîl de gnot, significât che o cjatìn ancje intal todesc “Stern”, intal inglês “star”, ma ancje intal talian “stella” (rivade de forme diminutive di “stera”, o ben “sterula”, di li che dopo al è rivât ancje l’“étoile” francês).
◆ Ogjet di poesiis e di invocazions e je ancje la lune, che in dì di vuê o savìn slusî dome par efiet dal soreli, ma che inte antichitât e jere considerade tant che une sorzint di lûs, e duncje il so non al ven propit de “lux”, daûr di une tradizion ereditade dai grêcs (“Selene”, che al ven dal verp par “slusî”, o ancje “feggari”, cul stes significât). Cemût che invezit o vin za vût viodût, l’inglês “moon” e il todesc “Mond” a divegnin di un tiermin che al definive il “misurâ” il periodi di timp tra un colm di lune e chel altri, che dopo al à dât vite ancje al “mês”. Juste par curiositât, la mission partide in Avrîl che e je rivade a fotografâ ancje lis musis platadis dal nestri satelit e cjape il non di Artemis, divinitât greghe de cjace, de nature e, juste apont, de lune. Za che o sin, o ricuardìn ancje che “satelit” al ven dal latin, cul significât di “compagn di viaç, dissepul, seguaç”, propit cemût che si compuartin chescj cuarps celescj che a van daûr dai “planets”, lis “stelis torzeonis” dai grêcs (“planetes asteres”). Par altri, i antîcs a pensavin ancje che i cuarps celescj dal sisteme solâr a fossin in stât di influençâ la formazion dai metai, cul Soreli che al creave l’aur, la Lune l’arint, Saturni il plomp (il sâl di Saturni), Mart il fier (no par nuie, al jere ancje il diu de vuere), Jupitar la ambre, Venus il leton (che in veretât al è une leghe) e Mercuri il stagn.
◆ Dut ce che si slargje parsore dai nestris cjâfs al fâs part dal “spazi”, peraule che no covente sclarî che si pee al concet di “estension”, che noaltris in dì di vuê in gracie di dutis lis tecnologjiis o savìn che al è daûr a slargjâsi e no savìn se al à une fin. Ancje i antîcs, si ben che no vessin imprescj cussì avanzâts, a vevin imparât a cognossilu e par orientâsi a lavin daûr des costelazions (cumbinazion dal latin “cum” e “stella”, o ben “insiemi di stelis”) e de lôr posizion intal cîl.
◆ Par prionte, miscliçant mît e cognossincis sientifichis, a vevin ancje capît di jessi dentri di une galassie, o ben di un “galaxía (kyklos)”, ven a stâi di un “cercli di lat”, nassût par colpe di chel brigant di Zeus/Jupitar, che par fâ tetâ il lat di Junon/Ere al piçul Ercul, che al varès cussì vût in regâl la imortalitât, al veve fat inrabiâ la femine divine, che si jere jevade sù di colp, strucjant intal cîl il lat, che al è deventât la nestre galassie, ancje cognossude par talian tant che “Via Lattea”. Une altre version nus conte di Fetont, fi di Helios, che pierdût il control des brenis dal biroç che al traspuartave il soreli, al fâs cori pal cîl i cjavai, cul risultât di brusâ dut e di fâ nassi la Vie dal Lat.
◆ Par dîle juste, par furlan cheste formazion e à nons che si pein ancje aes crodincis religjosis plui resintis, duncje ai riferiments dal Cristianisim: l’ASLEF (Atlant Storic Linguistic Etnografic Furlan) nus conferme che par ogni cjanton dal Friûl si podeve sintî diviersis definizions, dutis pardabon cetant particolârs. Si va de “Vie dal Cîl” (Pinçan) o de “Strade de stele” (plui neutri) ae “Strade di Rome” (e ancje “Strade Romane” o “Strade di Rome a Viene” o ben “Strade che e puarte a Rome”), che però e podeve ancje jessi “Strade di Egjit” (ancje “par zî la Madone in Egjit”), “Strade di Betlem” (Maran) o “Strade di Jerusalem”. Cence lâ masse lontans di chi, si podeve ancje clamâle “Vie di Barbane” (Cormons) o, ricuardant il patiment dal Signôr, fâle deventâ “Vie dal Calvari” (Torean). Po dopo, invezit, si podeve fâ stât sui sants, e duncje vê la “Strade dal Paradîs” (Pofavri), la “Strade da la Madone” (Prât di Cjargne, Navarons, Fane, ma ancje Cerneglons), la “Strade di Sant Jacum” (Puart) o ancje di “Sant Pieri” (Darbe), cussì come che si podevin nomenâ ancje i “re Magjos” (Murùs, ma ancje inte Basse). Pal so slusî, e podeve ancje jessi clamade “Strade blancje” (San Durì, ma ancje bande Cividât), “Stradalbe” (Vildivar), “Strade lusinte” (Rivignan) o ancje dome “Vie Latee” o “Vie dal Lat”. Interessante ancje la “Strade dai Marinârs” (parsore Osôf), che si pee ae funzion pratiche che e podeve vê la osservazion des stelis par cui che al lave par mâr.
◆ La mitologjie e la religjon a influencin il non di cheste galassie ancje par altris popui, tant che “la Strade dal stran” pai armens, turcs e cualchi paîs african, la “Vie di Santiago” pai Catalans e Portughês (par vie che i pelegrins di Sant Jacum di Galizie a lavin daûr di chest troi celest), o ben la “Vie di Sant Jacum”, compagn dai abitants de Cornualie, biel che invezit pai Slovens e je la “Rimska cesta”, ven a stâi la “Strade romane” (par vie che i pelegrins si orientavin cu la Vie dal Lat par lâ a Rome). O cjatìn ancje il “Flum di arint” pai cinês o “Flum celestiâl” pai gjaponês, il “Troi dai Uciei” pai Paîs baltics, il “Salt dal Cierf” in Gjeorgjie, la “Vie des vacjis claris” in Irlande, la “Vie dal Invier” in Islande e ancje in Scandinavie, la “Strade di Sante Ane” a Malte, la “Vie dai elefants blancs dal bon auguri” in Tailande, la “Vie dai Vuerîrs” in Ongjarie e tancj altris nons che a platin daûr storiis che a meretaressin di jessi cjapadis dentri intune publicazion di pueste.
◆ Ancje par chest mês il nestri spazi si è folcjât di tancj elements. Un agrât a Gianni Colledani che nus à sburtât a cirî intal cîl pal argoment di chest numar. E se o vês gust di mandânus lis vuestris ideis, o sarìn ben contents di provâ a resonâi parsore tai prossims articui! ❚