La Vignesie Julie come un “erôr” risorzimentâl?

160 agns fa, inte Contee di Gurize, par jessi precîs a Cormons, al vignive firmât l’armistizi ae fin de ultime des trê vueris di indipendence talianis. L’an prime, tal 1865, il storic di Udin Prospar Antonini, cu la sô opare Il Friuli orientale, al doprave la furlanetât di chest teritori par dimostrâ la sô italianitât. Ma al covente tornâ indaûr ancjemò un pôc par cjatâ l’epicentri di un stravuelziment identitari che o stin paiant lis consecuencis.
◆ Tal 1863 Graziadio Isaia Ascoli al inventave un toponim che ducj o cognossìn ben e che al cjate spazi ancje inte Costituzion: la Vignesie Julie. Lui, ancje se al è stât un esempli di ricognossiment de dignitât culturâl e linguistiche dal Friûl – e no par câs, a lui e je dedicade la Societât Filologjiche Furlane –, tant che ledrôs de medaie, al fo une “vitime” ecelente de inceade dal Stât nazion. Za de fin dal 1848, al jere sigûr che il futûr politic de regjon al fos intune Italie unide e liberâl. Insome, Ascoli – come che al sosten il studiôs contemporani Zuan Franc Elar – «al sacrificà il Friûl, che pûr e jere la sô “patrie” come che al scrivè, sul altâr dal nazionalisim talian».
◆ Tant che glotolic, al saveve ben ce impuartance che a àn lis peraulis inte politiche: la Vignesie Julie e cjatave sens cul so metisi cuintri al Litorâl (Küstenland) austriac, metût in pîts cul dissolviment dal Ream de Ilirie, tal 1849, e che la Contee e jere ad in plen part. In chest cuadri di rivendicazions, fin il tiermin “iredentist” al è une sô invenzion. Clâr, lis vôs contrariis no dome a jerin, ma a ziravin za de metât dal secul, come chê di Liopolt Comelli, che tal 1850, in L’Eco dell’Isonzo, al sperave inte cooperazion fra i popui e inte fin dai nazionalisims.
◆ L’etnograf di divignince boeme Carl von Czoernig – che, in tantis manieris, al fo une sorte di Morelli dal Votcent – tal 1873 al faseve jessî un volum centrât su la storie politiche e culturâl de Contee di Gurize. Chest libri al lave a compensâ lis riflessions filotalianis di Antonini, publicadis propit in chel an, partint di un slargjament de opare dal ’65 e calcoladis di Josef Marchet come “il codiç fondamentâl di dute la leterature iredentiste vignude daspò”. Cui siei lavôrs, Czoernig al cirive ancje di distudâ i spirts risorzimentâi e di rinovâ la fedeltât viers l’ordin sorenazionâl asburgjic. Di chest personaç, che al fo une vore atîf inte valorizazion de Contee, o tornarìn a fevelâ la prossime volte, par dopo cirî di aboçâ un ritrat de Gurize de Belle Époque.
◆ O sierìn cun cheste precisazion. Par scusâ Ascoli – che dut câs, daûr di ce che al à scrit Gjino di Cjaurià, al è forsit fin vonde facil cjatâ a posteriôrs distorsions ideologjichis –, al va ricuardât che, stant a Fulvio Salimbeni, cu la “Vignesie Julie” al voleve dâ ai talians sot dal Imperi un imprest di lote culturâl cuintri dal gjermanisim di Viene. Dome cu la Prime vuere mondiâl la denominazion si sarès imponude dal dut, ma aromai cuntune clâf di leture violente e nazionalistiche. ❚