Vinars ai 31 di Otubar dal 2025. Seste tape tal Troi di Aquilee, chê che di Masaruelis e va fin a Montmaiôr di Taipane e che e varès di jessi di 23 chilometris. Mara e à doi dîs libars e alore o decidìn di fâ dôs tapis une daûr chê altre. Par chel o vin prenotât di cenâ e durmî li de Tratorie Montecarlo di Montmaiôr. Cussì doman o fasarìn la setime tape, chê di Montmaiôr al pas di Tanamee, tal cjanâl de Tor.
◆ Aes 7 e un cuart o partìn di Masaruelis sot di une ploiute fine fine ma che e bagne une vore ben. La ultime tape o jerin stâts batiâts ben e no mâl de aghe. Vuê o tachìn za tal imprin cu la ploie. Ma, ploie o no ploie, Emanuela, Mara e jo, salts te nestre decision, si inviìn rive insù armâts di mantelinis. Passât il cimitieri, o lin sù par un troi ripit fin che o cjapìn un toc di strade asfaltade che nus mene al paisut di Tamoris. Te jentrade dal borc e je une biele capelute de Madone di Lourdes, là che si parìn un moment de ploie par consultâ la strade. Di li o montìn, simpri rive insù, par une strade militâr bandonade in beton che, dopo di un lunc tornant, e mene a une caserme de Finance grandute, ancje chê bandonade.
◆ Il pinsîr al va a ducj chei oms, i finanziots, dispès vignûts di regjons lontanis e che a stevin achì, fûr dal mont, par lâ su e jù in patulie dilunc chel confin insensât jenfri Italie e Jugoslavie. Ce vitis!
◆ De caserme si monte sù ancjemò, su la rive dal Joanas, la mont clamade ancje Juanis, par rivâ suntune creste dome di jerbe e prâts. Se al fos biel timp si viodarès un panorame bielon: a çampe la plane furlane fin te marine, a drete lis Alps Juliis, cu lis plui bielis pichis. Invezit al plûf fis e si cjale par tiere par no meti i pîts tes pocjis. Par prionte te creste, cence ripâr, e tire une bavesele frede e triste che nus fâs talpinâ par sghindâ chê posizion cussì esponude.
◆ La stradute cumò e va, rive injù, daûr dal Joanas, tal versant di tramontane, dentri di un bosc une vore biel e alt. Cjarpins, frassins, vuisignârs e soredut faiârs a son i protagoniscj di une palete di pôcs colôrs: zâl, ros e maron, ma cun sfumaduris di une varietât di no rivâ a dî: aur, limon, naranç, rose, ravost, bordò, sanghin, fûc. Miezis fueis a son ancjemò sui ramaçs, miezis a son par tiere, un grant tapêt persian intiessût des mans navigadis de nature che, magari cussì no, nus tocje vuastâ cu lis nestris scarpis imbombidis di aghe. La Sierade, dongje de ploie e dal prin frêt, nus regale cheste bielece che e jemple i voi e la anime.
◆ Il toc di bosc al è lunc, ma bielonon e simpri cuntune biele e costante rive injù. La ploie no mole, anzit, e je plui fisse. Ae fin o rivìn tune strade strete asfaltade che e mene, tressant prâts, boscs, riui e cualchi cjase, al Plan des Farcadicis. Li al è l’agriturisim Zardo che, par nestre disfortune, al è sierât. Alore o lin indenant viers dal confin cu la Slovenie in direzion di Rubidiscjis. Dopo un chilometri, juste li de stangje tricolôr, o cjapìn la stradele a çampe che e mene a Prossenic.
◆ Si va jù une vore, par un altri chilometri, viers il riul Legrade afluent dal Nadison, che o varìn di passâ tal vât, e che al tache a fâ sintî il sunsûr de sô curint imburide. Rivâts jù o vin la delusion grande. O vevin passâts altris vâts piçui cence bagnâsi ma achì nol jere il probleme di bagnâsi, al jere propit impussibil passâ. O savevin che al jere il vât ma o crodevin che al sarès bastât gjavâsi lis scarpis e i cjalçuts. Invezit al à plot une vore, la curint e je viamente e il nivel al è di scuasit un metri. Cu la aghe torgule e vegnin jù lens e ramaçs, che di corse a tombolin tal salt che al è subite dopo dal vât. Provâ a passâ al vâl compagn di copâsi!
◆ Si cjalìn scunîts. Ce fâ? O cirìn se al è un passadôr, un tronc par tressâ, un puest plui stret. Nuie. O consultìn la mape… nissun segnâl internet. Nissun segnâl telefonic. O scugnìn tornâ a montâ insù fin ae strade e rivâ là di Zardo. Il siôr nus spieghe che la uniche alternative par rivâ a Prossenic e je lâ pe strade fin scuasit a Cjaneule e dopo passâ par Platiscjis. A son lis dôs dopomisdì e mai e po mai o rivaressin a fâ ducj chei chilometris a pît prime di scûr. Nol è nissun che al podedi dânus un passaç cu la machine. Un moment pardabon di disconfuart.
◆ Ae fin o stimìn vê miôr la sigurece. O decidìn di tornâ indaûr a Masaruelis, ben si intint a pît, e di là, cu la machine, lâ a Montmaiôr, dulà che nus spietin pe cene e par durmî. Un pôc marumîts o tornìn a talpinâ ducj i dîs chilometris dal troi za fat ma cheste volte no lant jù ma di rive sù, daûr dal Joanas.
◆ “Parcè vâstu cussì svelt, pai – mi domande Mara – no covente cori.” “O sin tal bosc fis, a tramontane, cun rive insù e fra trê oris (o sin la vilie dai Sants) al fâs scûr – i rispuint – e no mi plasarès cjatâmi cul scûr ancjemò tal bosc.” No i conti che la mê fisse pe prudence mi fâs par solit imagjinâ ancje i câs plui bruts: se un di nô si inçopede? O se al cjape ancje dome une stuarte? O sin a chilometris de prime cjase abitade e no vin ni rêt internet ni telefoniche. No si inviisi intune aventure come cheste dongje dal imbrunî. Chescj e son i miei pinsîrs e par chel o sfuarci il pas a cost di sfladassâ.
◆ Tal ultin, o vin cumbinât. Rivâts a Masaruelis pôc prime dal scûr, o pues stâ solevât. Cu la machine o tornìn ju a Torean e, passant par Faedis, Atimis, Nimis, Torlan, Raune e Taipane, o rivìn a Montmaiôr. 45 chilometris! Dut par un vât!
◆ A Montmaiôr un acet pardabon biel ae tratorie Montecarlo. Lis sioris Margarite e Svetlana a àn viert il locâl dome par nô, parcè che o vevin prenotât. Une vore zentîls. Nus àn parecjât taiadei cul cenglâr e un frico cu la polente bonon. Al plûf ancjemò e al fâs frescot e o vin cenât denant dal fûc dal cjaminet. O vin rivât ancje a fevelâ dal lûc. Lis dôs feminis nus contin che a Montmaiôr (Briezje par tersko), paîs plui alt de valade dal Cuarnap, a son restâts dome in nûf a stâ alì dut l’an. Tal Istât e je plui int, ancje in gracie dal Troi di Aquilee. Cundut che al è brut timp, no podìn no preseâ la bielece e il valôr di chescj puescj. Par secui achì e steve int che e veve savût vivi doprant e guviernant lis risorsis naturâls e dal lavôr. Int che e veve produsût une sô culture e une sô lenghe che si son disvilupadis des particolaritâts di puescj cussì margjinâi e, tal stes timp, de contaminazion jenfri il mont slâf e chel furlan. Al ven un grop a pensâ che, cui ultins abitants, al è il pericul di pierdi dut. Se al capitàs, cui tignaraial a ments il versant di misdì dal imponent Gran Mont? Cui abadaraial a ducj chei prâts e boscs, a chei trois e riui? O speri che no vedin reson chei sorestants di Rome che a scrivin che chestis, che a calmin Aree Interne, “… hanno bisogno di un piano mirato che le accompagni in un percorso di cronicizzato declino e invecchiamento”. Robis di no crodi ma veris!
O lin a durmî intune biele cjamare un pôc frescote sot di un buine sfilzade. Tal doman nus spiete la setime tape, di Montmaiôr al Plan dai Ciclamins tal cjanâl de Tor. Cheste, che no sin rivâts a puartâ insom, le tornarìn a fâ vie pal Istât, cuant che nol plûf e si rivarà a passâ chel benedet vât che nus à blocâts. ❚
[Tal numar che al ven la tape di Montmaiôr di Taipane – Cjanâl de Tor]
