Tai ospedâi lis personis che a son in cure spes a àn pôre e tante voie di tornâ cjase. Cuant che si è pazients si stâ atents a ogni minime peraule, a ogni moviment. Ta chei moments alì ancje un ton di vôs al è impuartant, o pûr une cjalade cence dî nuie. Ogni sfumadure e pues judâ a vuarî o a fâ inmalâ ancjemò di plui.
◆ Sintî a fevelâ in marilenghe al jude a vuarî. Ancje dome une peraule par furlan e pues jessi tant impuartante par sintîsi miôr. Miedis e infermîrs a varessin di fevelâlu sul lavôr, e chei di lôr che no lu cognossin, a varessin di imparâ a dî ancje dome cualchi peraule, il rest al rivarà bessôl se al varà voie di rivâ.
◆ La marilenghe e à un sô podê curatîf; chest al permet al malât di vê plui fuarce e al personâl sanitari di rivâ a cognossi di plui i pazients, a capîju miôr e a metisi plui in sintonie cun lôr. Cognossi il furlan al dâ mût di interpretâ miôr i segnâi che, pe persone che e stâ mâl, a son plui dificii di esprimi. Fintremai il stâ cidin: il tasê di un furlan al è diferent di chel di une persone che e ven di fûr.
◆ Chi no si fevele di capî lis peraulis di int che no sa a esprimisi ben, ma di capî lis personis; de impuartance che al à cognossi cui che tu âs devant e provâ a curâ i pazients ancje cu la strade de lenghe, in maniere indipendente de etât e dal nivel di istruzion dal singul.
◆ Dâ impuartance ae lenghe furlane al puartarès miedis e infermîrs a vê struments gnûfs par mistîrs che, plui di altris, si fondin suntune vocazion. ❚
Il podê curatîf de marilenghe
Luca Bertossi
