Angela Sbrizzai, la sartore 2.0 che no dismentee la tradizion

In vie Case Sparse al numar 11 a Paulâr si cjate la sartorie ModAStîl di Angela Sbrizzai “O ai viert partide IVZ intal 2017. Cuant che o jeri tes mediis o soi lade a viodi lis scuelis superiôrs e mi è plasude tant la scuele di sartorie a Glemone. O premet che mê mari e mê none a àn simpri cusît, mê none e cusive e e comedave vistîts, mê mari e lavorave plui par Carnevâl che vie pal an e a mi e a gno fradi nus faseve simpri cualchi vistît. Jê mi à simpri dit che fâ la sartore al è un biel mistîr. Cussì mi soi notade a cheste scuele e mi è propit nassude la passion. Ancje in dì di vuê par me nol è cambiât e par chest no lu sint come un lavorâ, parcè che no mi pese.
◆ A cjase o ai une stanzie indulà che al è il gno laboratori. Se mi capite di no lâ li dentri, o sint che mi mancje il cusî parcè che mi plâs propit il lavôr che o fâs e lu fâs miôr che o pues, simpri. Fasint dut su misure nol è facil fâ i vistîts ancje parcè che ognidun al è fat diferent. Jo par solit o fâs cussì: lis personis a vegnin une prime volte cussì o cjapi lis misuris, dopo o fasìn une prove e, se al è di modificâ alc, o proviôt. Dopo di chest, il vistît al è pront pe consegne. Il risultât, oltri che a jessi su misure, al è ancje unic. No fâs mai un compagn di chel altri ancje par dâ la esclusive e ancje par vie che al è biel fâ robis diferentis.
◆ Di 3 agns incà o ai scomençât a fâ ancje i vistîts par om, par solit nuviçs o par altris contescj. Chest mal soi studiade bessole parcè che a scuele no mi àn insegnât la monture pal om, ma dome pe femine, e cussì mi soi cjolte i libris e o ai studiât.
◆ O fâs ancje i vistîts di femine tradizionâi de Cjargne, vistîts todescs, gjilês di om. In chest câs mê mari mi ricame lis rosis. Cumò o ai comprât ancje la machine ricamadore e cussì o stoi studiant di fâ il ricam a machine, ancje se a ‘nd è tantis oris di lavôr… ma mai come a man. Il risultât nol è compagn, ma al è biel istès. Almancul tal gjilè al ven precîs tant di une bande che di chê altre, fat a man nol podarà mai jessi precîs. In ogni mût, o domandi simpri al client cemût che al preferìs che al vegni fat il ricam. Il ricam che e fâs mê mari al è chel che e à imparât lant a fâ scarpets.
◆ Jo o spazi un pôc par dut: ce che mi plâs fâ di plui a son i vistîts di cerimonie (nuviçs in particolâr) e i gjilês di om. Cuant che no vevi tant lavôr, soredut di Invier, o ai cirût di fâ alc altri. O ai fat robis pai fruts: sets di asîl, robis pes nassitis (galis e altri). Gracie ae ricamadore o pues personalizâ ce che o fâs.”
◆ In zonte al so lavôr. Angela e ten ancje un cors: “Di Otubar a Jugn, dôs voltis par setemane, o voi a Reane, li de Giesse Scampoli, par insegnâ a fâ vistîts a int che e à gust di imparâ. I cors a son vierts a ducj. E ven ancje une frute 12 agns cun sô mari, ma o ai vût ancje une di 11 agns, dopo a son tantis feminis pensionadis; o ai int di ogni sorte: di chê che no sa cusî a chê che e sa za fâsi alc. Ognidun al fâs ce che al vûl, cui ‘Cartamodelli Burda’ o disvilupìn il progjet dal vistît, ur spieghi cemût cjapâ il stamp, cemût modificâlu su la persone e di li o lin indevant. Jo no soi zelose dal gno lavôr e o insegni dut ce che o sai, no ai segrets, ancje se a mi no mi àn insegnât dut.”
◆ Graciis al cors, Angela e à cognossût tante int fûr de Cjargne, tancj le àn cognossude viodint la sô pagjine Facebok ancje se e lavore di plui cul passeperaule.
“Mi è volût un pôc par rivâ là che o soi. – e va indenant – O soi stade 6 agns a Rimini e, di cuant che o soi tornade, nol è che o soi partide ben subit. Mi è volût un biel pôc di timp par vê il gno zîr. Jo cumò o ai za nuvicis che si son prenotadis pal prossim an. O soi bessole e o lavori par un, no rivi plui di tant. O ai doi fruts piçui e o ai di viodi ancje di lôr. Ogni tant mi capite di lavorâ ancje di gnot. Ma o soi contente, mi plâs il gno lavôr.” ❚