Al è a pene jessût il gnûf progjet discografic de cjantante e compositore cjargnele Elsa Martin. E cui no le cognossie! Il disc al à titul “Vox Humana”, e chi la vôs, la sô vôs tant biele e versatile, e je protagoniste come unic strument vîf e pulsant che si messede ae dimension spirituâl e umane dal so fâ artistic, caleidoscopic, lusint e lunâr insiemi, plui unic che râr. Espressions libaris dal sintî che al ven di dentri, composizions gnovis che a refudin la regjistrazion dispès masse frede des gnovis super tecnologjiis. No stait a domandâi ce che e je la inteligjence artificiâl dentri de musiche e de composizion “pilotade” di une presince assente, parcè che la sô vene creative e ven dome de sô anime e dal so cuarp, dutun cu lis personis e i ambients che e à cjatât e che e cjate sul so troi artistic: musiciscj, nature, vivi, altris artiscj, int semplice, famee, amîs, animâi, animis in viaç. La sô vôs, no come un sempliç strument, ma come une cjase de peraule, un cuarp che al respire, al ricuarde e al dubite, si esprim, in grande libertât e creativitât. Il disc, nassût dopo une ricercje di cinc agns, al è pensât par vôs sole e si slargje in siet tocs sospindûts jenfris tramis eletroacustichis e lirichis al feminin, cetantis a son scritis di jê ancje tai tescj, fasint dialogâ il furlan cul talian e l’inglês. Viers siei, come che o disevi, e di Novella Cantarutti, Emily Dickinson, Roberta Bosa, Antonella Bukovaz e Stefano Battaglia che al firme lis musichis di “Ceresârs”. Un lavôr contemporani, ancje radicâl, che però nol romp il leam cu la tiere, ma lu puarte plui indentri, lu strenç ancjemò di plui.
◆ Di chest e je fate la strade di Elsa Martin, artiste che no à mai doprât il furlan come colôr locâl, ma come materie vive, buine di stâ dongje ae improvisazion, al jazz, ae scriture contemporanie e ae ricercje vocâl.
◆ Za tal so prin album, “vERsO”, jessût tal 2012 e rivât finalist ae Targhe Tenco come “opera prima”, la lenghe mari e jere un pont tra memorie popolâr e forme gnove. Chê direzion e je deventade plui clare cun “Sfueâi”, realizât cun Stefano Battaglia e dedicât ae poesie furlane dal Nûfcent. Il titul al ven di Novella Cantarutti, e intal disc o cjatìn lis vôs di Pier Paolo Pasolini, Amedeo Giacomini, Federico Tavan, Maria Di Gleria e Pierluigi Cappello. Dopo e je vignude la esperience di “Al centro delle cose”, ancjemò in cubie cun Battaglia: Elsa e à puartât tal cjant il mont poetic di Cappello rivant a une forme rare di intimisim sonôr. E cun “Lyra”, dedicât a Pier Paolo Pasolini, il lavôr su la lenghe furlane al à cjapât une altre misure ancjemò. No dome memoriis di Cjasarse e de “Academiuta”, ma domandis viertis al presint, su ce che la poesie dal poete corsâr nus dîs ancjemò cumò in timps di omologazion.
◆ Cumò, il cuadri si complete cu la jessude di “Vox Humana” pe etichete Centripeta e cul jutori a nivel di mixing e mastering di Artesuono di Stefano Amerio e di East Land Recording Studio di Francesco Blasig. In chest disc, che al sarà presentât in diviersis ocasions (par cognossilis stait daûr de artiste sui siei profîi social), dut il so percors al cjate sintesi e ampliament in gracie di une ricercje profonde dentri e fûr de peraule, dentri e fûr dai pentagrams, inte improvisazion e ancje inte organizazion gnove dal discors musicâl che nol refude nuie, ma che al cjape e al trasforme dut. ❚
