Un scandai masse onest
e par chel tignût tal scansel
Tal presentâ chest spazi, titulât “Di ca o di là da la Aghe”, o ai vût scrit: “O puartarìn lis provis che il Friûl di Soreli a mont al è inmò furlan”. Po ben, e je vignude la ore di puartâlis. Cu la ocasion, o ricuardarìn ancje cemût che si definissin chei che a son a stâ di altris bandis de regjon. Par savê se a son inmò furlans a soreli a mont, al bastarès lâ sui marcjâts di Manià, Spilimberc, San Vît, ma si disarà che il sisteme nol è sientific. Impen, si podarès dâ un cuc aes cjartis etnolinguistichis, ma al saltarès fûr chel che al disarà che a son stadis ordenadis de ARLeF o, fintremai, da La Patrie dal Friûl par tirâ la aghe al lôr mulin. E, inalore, bon par nô che o vin une prove, sientifiche, e parsore di ogni suspiet.
◆ O vin di tornâ ai agns des Provinciis, cumò che si discut di tornâ a metilis sù. Dilunc des discussions, cualchi timp prime de muart di chescj ents, rivade tal 2016, i lôr sorestants, soredut chei di Pordenon, che sigûr no volevin jessi mandâts a cjase, a àn vude une pensade: peâsi ae identitât, disint che lis cuatri provinciis a jerin un presidi necessari par mantignîlis vivis dutis… cuatri. Come se a ogni Provincie e corispuindès une sô identitât. Ven a stâi come se in regjon a fossin une identitât pordenonese, une gurizane, une triestine e – stant che o sin di bon cûr – une furlane dome te provincie di Udin.
◆ Par dimostrâ la tesi, la Union des Provinciis dal F-VJ i de la incarghe di fâ une ricercje demoscopiche a un studi specializât. Bon par nô, il studi incargât al fasè il so lavôr cun professionalitât e serietât e cun chel al de un grant displasê a chei des Provinciis e, soredut, a chei di Pordenon. Tant che la ricercje no fo mai pandude e nô le podìn viodi dome in gracie di une buine man che le à tirade fûr dal scansel. Le vevin platade parcè che e dineave la pretese insensade che tal Friûl di soreli a mont e fos chê pordenonese la identitât plui numerose. Invezit, come che si pues viodi tal grafic chi dongje, i furlans a son, plui o mancul, i stes di ca e di là da la Aghe. In particolâr, te ex provincie di Pordenon, sumant chei che si definissin furlans e chei che si declarin furlans ocidentâi si rive al 71%. Pordenonês si definìs dome il 23%, ven a stâi chei de citât. Come tal Friûl di mieç, par altri, là che udinês si declare il 21% de popolazion. E ancje la ex provincie di Gurize, cul 53%, si declare furlane. Nuie ce dî che a Triest si declari triestin l’80% de popolazion e just, ancje, che dome il 15% si declari julian. ❚
