Li che a svolin lis acuilis… e altris uciei simbui de nestre tiere

S i lu sint dai barcons sbitiâts dome dai colomps, dai parcs dai paîs simpri plui svuedâts di arbui o dai cjantons di nature che ancjemò a olsin a resisti al beton che aromai si glot ancje lis spuindis dai flums. Nissun ciccicâ, nissun svoletâ, nissun cjant armoniôs a segnalâ la presince di creaturis aladis. Dal rest, intai ultins 26 agns (dâts 2000-2025), la Italie e à pierdût il 33,5 % dai uciei che a vivin in ambients rurâi, cul 71% des speciis in calâ, massime passaris (-60%), lodulis, (-54%), papefurmiis (Jynx torquilla, -76%), gjarlis (Lanius, -65%) o verdons (-59%).
◆ Un distudâsi de biodiversitât che nol sparagne nancje i cjaçadôrs, tra velens, ridusisi di spazis e di predis, incidents cuintri lis machinis ma soredut intor dai pilons de linie eletriche.
◆ No se passin ben nancje i simbui de nestre regjon e dai nestris parcs, stant che, cundut che la popolazion des acuilis reâls e je daûr a cressi intes zonis li che e je protezude, e je cuasi pronte a sparî in tantis altris bandis di Europe. Il so non sientific Aquila chrysaetos al vûl dî “acuile indorade” (dal grêc “chrysos”), li che “aquila” al podarès vignî sedi di un tiermin par “scûr”, lant a marcâ il colôr des plumis, sedi di une vôs che si pee ae velocitât o al aiar. Pal so aspiet, chest nemâl al è stât sielzût par rapresentâ diviers popui e divinitâts: dal messazîr di Zeus, aes legjons romanis, par dopo passâ al imperi gjermanic e rivâ fin aes nestris bandieris e ancje ai segnâi dal Parc naturâl des Dolomitis furlanis. De acuile si volarès fâ rivâ ancje il non latin di Aquilee, ancje se al va ricuardât che il paîs al esisteve bielzà prime che a rivassin i romans, e al è probabil che i siei altris toponims (tra di chei Olee) a fossin peâts ae presince di aghe (tra i diviers studis, si segnale chel di Maurizio Puntin su la toponimie di Aquilee). Chest uciel, dut câs, si lu cjate scuasit in dut il mont, cu la sô regalitât che e reste ben presinte intal spagnûl “águila real” e intal francês “aigle royal”. Pai inglês al devente “golden eagle” (cul “eagle” che al è rivât dal francês antîc, su evoluzion di “aquila”, biel che il “golden” si pee dret al non sientific), intant che pai todescs al è “Steinadler”, ven a stâi “acuile dai crets” (“Adler” al sta par acuile, e nus ricuarde l’adietîf “adel”, o ben “nobil”, li che invezit “Stein” e je la piere).
◆ Altri rapaç dal nestri teritori al è il Bubo bubo (tautonim, o ben “cul stes non” scrit par dôs voltis), par talian “gufo reale”, par furlan “dûc” o “grant dûc” (compagn dal francês “grand-duc”), ma ancje “çus” (onomatopeic, simil al “ciusso” venit), “çus grant” o “çus reâl”, “barbezuan”, “dudu” e “catùs”, daûr des diviersis localitâts. Par todesc al è l’onomatopeic “Uhu” (juste, propit la marcje de cole zale), biel che invezit par inglês al è un “eagle owl” (“owl” al devi jessi onomatopeic e si lu dopre sedi par çus che par civuitis), duncje “çus-acuile”, o ancje “great horned owl”, o ben “çus dai grancj cuars”. Al è il simbul de Risierve naturâl dal lât di Cornin, che al fâs ancje biele mostre di se alì dal centri visitis di cheste aree, plui cognossude pe presince dai grifons (Gyps fulvus), che la lôr etimologjie si pee aes sgrifis (cun tiermins che a ricuardin “gafâ”, ma ancje “lincin”).
◆ Se o lin sù pes monts, intal bosc milenari di Tarvis o cjatìn il “gjal di mont” (Tetrao urogallus), clamât ancje “dindi di mont” o “gjal salvadi”. Il non sientific al ricuarde che al fâs part de sotfamee dai tetraons, duncje chei uciei che a àn cuatri ongulis tes çatis, biel che “urogallus” al ricuarde la code particolâr, che si vierç a raiere. Par talian, chel “cedrone” al marche il colôr vert des plumis de code, cetant scjassosis intal mascjo, intant che la femine e je une vore mancul colorade. Al è tra lis speciis vulnerabilis te liste rosse dai uciei che a fasin il nît in Italie, li che la sô popolazion e rapresente mancul dal 1% di chê europeane.
◆ Altri uciel de famee dai fasans in dificoltât al è il “cator” (Alectoris graeca), che al rapresente il Parc naturâl des Prealps Juliis. Il so non sientific al vûl dî “poleç de Grecie”, par vie de aree di divignince, biel che par talian “coturnice” al marche la someance cu la cuaie. Par inglês, la “rock partridge” e je la “pernîs des pieris”, compagn dal todesc “Steinhuhn” (“Huhn” al è in gjenerâl il poleç).
◆ Lant jù inte Risierve naturâl de Val de Albe si cjate il “picot neri” (Dryocopus martius), li che il non sientific al ricuarde il so picâ cuintri dal arbul, cun chel adietîf “di Mart” par vie dal colôr neri cu la creste rosse. Tes traduzions in altris lenghis, si marche propit il colôr neri par ricognossi la specie di altris picots (l’inglês “black woodpecker”, il todesc “Schwarzspecht”, il francês “pic noir” o il spagnûl “pito negro”).
◆ Altre risierve di mont e je chê dal Foran de Ciline, che e à par simbul il mierli di aghe (Cinclus cinclus), par talian “merlo acquaiolo”, che al reste compagn ancje par todesc (“Wasseramsel”), li che invezit l’inglês al marche la abitudin di butâsi te aghe dal uciel (“European dipper” o “white-throated dipper” par vie dal cuel blanc).
La Fôs dal Stele e la Val Cjanâl Gnûf a vegnin rapresentadis de plui piçule raze europeane, la “cercegne”, o ben Anas crecca, par talian “alzavola”, par todesc “Krickente” (pal rumôr che e fâs, daûr dal non sientific), li che invezit la traduzion inglese “teal” e à ancje dât il non al colôr vert aghe, tipic dal cjâf dal mascjo.
Inte Fôs dal Lusinç la raze che e rapresente la aree naturâl e je la “arcaze”, ven a stâi la Numenius arquata (par vie dal bec stuart a forme di mieze lune), par talian “chiurlo maggiore” (onomatopeic). Il todesc “Brachvogel” al marche la usance dal uciel (“Vogel”) di fâ il nît intai cjamps pustots (“brach”), biel che l’inglês “curlew” al è un onomatopeic, ma al podarès ancje peâsi al fat che la bestie e je in stât di cori (dal latin “currere”).
Ultime aree rapresentade di uciei e je chê de Val Cavanata, cognossude di ducj pes fotografiis cui fenicotars (Phoenicopterus, o ben “uciel des alis rossis”, che par inglês al devente “flamingo”, ven a stâi “dal colôr de flame”), ancje se il simbul de risierve e je la ocje salvadie (Anser anser), “Graugans” par todesc (“ocje grise”), li che invezit l’inglês “greylag goose” (“ocje grise che si intarde”), nus ricuarde che la specie e emigre plui tart rispiet a chês altris.
O sierìn cuntun uciel che al podarès deventâ il simbul de nestre rubriche: il “barbezuan” (Tyto alba, o ben “blanc”), che al à pôc a ce viodi cui barbis che si clamin Zuan, ma al è plui facil che il so non si pei aes peraulis latinis “barba” e “gena”, o ben “barbe” e “smursiel”, par vie de mascare di plumis te muse: no par nuie, par todesc lu cjatìn tant che “Schleiereule”, o ben “civuite dal veli”. Par inglês, chest uciel al ven clamât “barn owl”, o ben “çus dal cjast” par vie che dispès al fâs il nît o si pare intai granârs.
In sumis, ancje par chest mês o ai fat svolâ masse i pinsîrs e voaltris, intal faturâ a stâ daûr di chescj resonaments matarans o vês propit reson di dîmi: “E ce vitis par mangjâ vuitis!”. ❚