Trê vôs dal Cuarantevot

No si pues pensâ di saltâ inte mentalitât iredentiste cence vê prin metût a fûc un passaç obleât de Europe contemporanie. Tal 1848, la cussì clamade Primevere dai Popui e scjassà lis fondis de Restaurazion tant insot che l’ideâl romantic di une patrie libare e indipendente nol podeve plui jessi ignorât dai sovrans. Intal stes an, trê inteletuâi si confrontarin su la apartignince nazionâl di Gurize e, in gjenerâl, su la sô unicitât culturâl.
◆ Il prin a tacâ sot al fo il gjornalist Zuan Rismondo, che al sburtà fûr lis sôs passions pro talianis publicant a Udin un opuscul che al introduseve un teme dal dut gnûf pal centri dal Friûl orientâl: chel de nazionalitât. Dentri al declarà che “Gurize e je citât taliane. Taliane la tiere, talian il cîl, talians i ûs e taliane la lenghe”. Chest cundut che lui stes al veve notât che l’ambient civic dulà che al viveve al jere restât dal dut fûr dai disordins.
◆ Si à di notâ, però, che Rismondo nol jere gurizan, ni par nassite ni par formazion. Di fat, al jere origjinari di Rovigno e al si trasferì a Gurize dome cualchi an prin dai riviei dal 1848. Di là de sô cognossince imprecise de storie dal teritori che i veve dât acet, al ven ricognossût in lui ancje un clâr sintiment di nostalgjie pe Republiche di Vignesie.
◆ Il prin a rispuindii al fo Josef de Persa, un nobil filoaustriac che al de fûr une locuzion tant singolâr che evocative: “Gurize e je citât limitrofe”, e dentri “al è il passaç lent dal naturâl svicinament dai popui […]”. Insume, une citât di confin e di coesistence che no veve “comuns ni i interès, ni lis ideis” cu la rivoluzion taliane intal Ream Lombart Venit.
◆ La figure di Graziadio Isaia Ascoli, in chel timp ancjemò une vore zovin e futûr famôs glotolic, e complete chest tritic. Ancje se al tindeve a supuartâ lis tesis dal gjornalist istrian, tal stes timp lis morestà. Vivint dentri di chel curizûl di lenghis che e jere la capitâl de Contee, al jere ben cussient de sô cualitât distintive. Di fat, cun dut che al definì il popul gurizan come “cence dubi talian par nazion”, al sostignive che chest nol scugnive par fuarce compuartâ la indipendence, e che no jere nissune contradizion tal viodi la “talianissime Gurize” rapresentade tal parlament di Viene.
◆ Par lui, lis istancis liberâls dal Cuarantevot no vevin di puartâ a un conflit jenfri lis nazions, ma pluitost al lôr rispiet dentri dal Stât esistent. Al identificà intal disvilup educatîf, e in particolâr inte creazion di une scuele in lenghe taliane, il mieç just par risolvi la “cundizion di ritart culturâl”. A chest ultin fatôr al atribuive la passivitât de citât tal partecipâ aes rivoltis. Adore, come che o viodarìn, al varès in part cambiât idee.
◆ Ce che al ven fûr di cheste panoramiche curte di visions no je tant une valorizazion no ideologjiche des identitâts e des comunitâts locâls, ma pluitost une difese fuarte de nazion come concet centrâl pe evoluzion politiche future dai Stâts, soredut dai Imperis. La dramatiche spirâl dal nazionalisim e jere scomençade. ❚