ATUALITÂT. Provinciis furlanis a cunvigne

Passaç di consegnis dentri de Associazion des Provinciis Furlanis. Il president de Provincie di Pordenon Alessandro Ciriani e chel di Udin Pietro Fontanini, adun cun buine part dai lôr conseîrs, si son metûts dongje ai 3 di Otubar tune sentade uniche pal passaç de presidence de Associazion che di Pordenon e je passade a Udin.
LA STORIE_ La Assemblee des Provinciis Furlanis, unic esempli in Italie al moment, e je nassude, daûr de Leç Regjonâl n. 1 dal 2006, ai 28 di Setembar dal 2007 cuant che sul puint di Pinçan si jerin cjatâts i doi Presidents di chê volte, Elio De Anna e Marzio Strassoldo, par firmâ l’at costitutîf.
La Associazion e à dutis lis intenzions di dâ servizis bogns ai citadins cun mancul spesis.
I INTERVENTS DECIDÛTS_ Si à sielt trê setôrs di intervent (ambient, viabilitât e formazion) li che al sarà ce discuti par ce che al inten lis cuestions dal incuinament e dal smaltiment dai refudums, la progjetazion de viabilitât “Cimpello-Sequals-Glemone”, il completament de Strade Provinciâl 52 bis, la realizazion de variant di Barbean, la metude in sigurece dai trê puints che a unissin i teritoris des dôs Provinciis: il puint di Pinçan, chel di Madrîs e chel de Val Darzin. Po dopo la intenzion e je ancje chê di meti in pîts uficis comuns o di dâ la deleghe a un ufici unic pe tutele de lenghe furlane e di coordenâ azions pe difese de Universitât dal Friûl tant che istituzion culturâl che e promôf su dut il teritori furlan la formazion tecniche e sientifiche des dôs comunitâts. La conference tecniche e scomençarà cussì a lavorâ parsore chescj ponts e jenfri Otubar e Dicembar e vignarà clamade adun une altre Conference Interprovinciâl par meti jù i prospets economics e finanziaris che a coventin par meti in vore lis propuestis vignudis fûr.
GURIZE ANCJEMÒ FÛR_ Magari cussì no, il president de provincie di Gurize Gherghetta al à inmò criticât la union, lant indevant cu la intenzion di no cjapâ part ae Assemblee; critic ancje il sindic di Pordenon Bolzonello.
lenghe.net / redazion