✽✽ Cuâl isal il pinsîr plui grant par cierts “furlaniscj” di vuê? Sigûr la sensazion, che si volte dispès in pôre, di no jessi calcolâts o, piês ancjemò, di jessilu in mût paternalistic se no denigratori. Il fat di jessi erêts di un pinsîr che al fonde lis sôs lidrîs inte nature stesse des nestris comunitâts, su la lôr determinazion a volê jessi protagonistis de lôr vite coletive, al somee che nol sedi avonde par afermâ, di consecuence, un dirit ae esistence di un moviment che al torni a afermâ la sô validitât.
✽✽ Si citin dispès, in chest periodi di celebrazions e aniversaris, i nons di pre Checo Placerean, di pre Marchet e di pre Toni Beline cence ricuardâ che ae fonde di ogni lôr scrit al è il concet di autodeterminazion dal popul furlan.
✽✽ Dismenteant chescj insegnaments, de convinzion fuarte metude par puartâju indenant, in tancj e je nassude la dibisugne di rimarcâ in ogni ocasion il fat che jessi autonomiscj nol significhe jessi sierâts intun sierai autocelebratîf, e che la diversitât no vûl dî jessi miôr di altris. E vie cussì, cuasi a volê simpri justificâ ce che al varès di risultâ aromai un dirit acuisît.
✽✽ Che nol sedi cussì lu constatìn inte cuotidianitât, intai piçui episodis e inte indurance che si fasin sintî puartant te fumate progjets tant che la autonomie scolastiche, la presince de lenghe furlane in Rai e la autorizazion al ûs dal Messâl furlan.
✽✽ Il spetacul avilît dal dibatiment, se o podìn clamâlu cussì, sul tornâ des Provinciis al è une altre prove di chest.
✽✽ O sclarìn daurman che no je une posizion ideologjiche e nancje di formazion precostituide intai rapuarts sedi cul centridrete che al torne a proponi la struture preesistente, sedi cul centriçampe che si opon al progjet. Ducj i doi, par dovê di croniche e o disarès di coerence, a varessin di ricuardâsi di vê votât in Consei regjonâl ae unanimitât pe lôr abolizion.
Al è ancjetant palês che ogni autonomist al è a pro des elezions che a puartin un minim sindicâl di rapresentativitât, cul esercizi dal dirit di vôt, espression di une democrazie simpri plui cjapade in ostaç des segretariis dai partîts talians e des lôr sucursâls locâls.
✽✽ Il pont però al reste un altri: parcè che pûr vint il timp necessari no si è volût viodi inte riproposizion di ents di aree largje une ocasion par tornâ a modelâ il sens stes de Regjon. Par pôre di ce si vaie bande une leç piçulute che no fronte il probleme vêr e simpri plui pressant di cheste Regjon autonome: la unitât aromai insopuartabile e pustice di dôs realtâts incompatibilis par storie e interès tant che il Friûl e Triest? ❚
