Lenghis, dirits e minorancis, la ELEN e domande une azion strategjiche a nivel european

Dopo de azion di monitorament, fate ae fin di Zenâr dal relatôr speciâl de ONU pes cuistions che a tocjin lis minorancis, Nicolas Levrat, e in spiete che e salti fûr la sô relazion finâl, tal ultin mês inte Union Europeane (UE) si à tornât a fevelâ di lenghis minorizadis, dirits e tutele. Al è sucedût ai 5 di Març stâts, intant de ‘Setemane de Societât Civîl’, inmaneade dal Comitât Economic e Sociâl European (CESE), l’orghin consultîf de UE là che si dan dongje i rapresentants des organizazions dai lavorents, di chês dai imprenditôrs e di altris grups di interès, che al fâs indenant parês e osservazions ae Comission (CE), al Parlament European (PE) e al Consei de UE. In chê dì, inte suaze de ‘Setemane’, il teme di discussion al jere chel de partecipazion civiche pe costruzion de resilience. Cun riferiment specific ae cuistion des lenghis minorizadis in Europe al è intervignût il cornic Davyth Hicks, che al è il segretari gjenerâl dal European Language Equality Network (ELEN, Rêt Europeane pe Avualance des Lenghis), organizazion che e ten dongje une schirie di associazions, organizazions e istituzions che a son espression des diviersis minorancis e nazionalitâts europeanis.
◆ E je stade la ocasion par ricuardâ che il procès di minorizazion di lenghis e dirits al va dilunc e che lis lenghis minorizadis a patissin une dinamiche di discriminazion: la plui part di chês si cjate intune situazion di pericul fintremai di sorevivence. Hicks al à marcât che la cuistion e tocje in maniere direte almancul cuarantecinc milions di citadins de UE e che la minorizazion des lenghis no je alc che al sucêt in maniere «casuâl» e «naturâl», ma il lôr ûs e fintremai la lôr esistence a son metudis sot atac intun cuadri specific di rapuarts sociâi, culturâi, economics e politics.
◆ «Stant che il rispiet de diversitât linguistiche al è un valôr e un principi de Europe – al à zontât Hicks – al covente che la UE e meti in vore une azion strategjiche di promozion e di tutele, ancje in rispueste aes osservazions critichis za fatis indenant dal relatôr speciâl de ONU, Nicolas Levrat, in ocasion di une conference stampe ae fin dal so monitorament e aes domandis che a rivin des diviersis comunitâts di lenghe minorizade».
◆ Pal segretari gjenerâl de ELEN «al covente che lis istituzions de UE a vedin cussience dal fat che la tutele des minorancis e la promozion de diversitât a son fondamentâls, tra ricognossiment e garanzie di dirits di fonde e valorizazion dal patrimoni culturâl». Par inviâ e par disvilupâ une azion strategjiche di promozion e di tutele de bande UE a coventin une normative di pueste specifiche e inzornade e finanziaments che a permetin di metile in vore pardabon. Il scheme fat indenant al met dongje chel che al è stât definît tant che un Cuadri Strategjic pes Lenghis Minorizadis e Menaçadis e la creazion di un Comitât di Emergjence pes Lenghis Minorizadis e Menaçadis, une struture indotade de capacitât finanziarie garantide che i permeti di meti in vore azions e progjets cun continuitât e cun eficacitât concrete.
◆ La propueste e je interessante e inteligjente. Rivarano lis istituzions de UE a cjapâle sù e a metile in vore? Il contest european e internazionâl e la sensibilitât dai sorestants di Bruxelles in cheste fase nol somee che a sedin masse a pro. Ma il fat che si torni a fevelâ de cuistion al è par sigûr alc di bon. Viodarìn ce che al nas. ❚