Cuant che la Lega Nord e jere autonomiste (e furlaniste)

Al è lât indenant ancje Bossi il “senatur”, protagonist di prime grandece de politiche taliane dai ultins cuarante agns. Al veve intuît il valôr, ancje in politiche, de identitât dai teritoris e che par contâ tal parlament roman si scugnive metisi adun, meti dongje dutis lis istancis autonomistichis, ancje piçulis, par fâ sù une masse critiche. E cussì al à inventât la Lega Nord e po dopo la Padanie che prime di lui e jere dome une espression gjeografiche. Al à vût il grant merit, come che al scriveve tal 1997 pre Toni Beline “di vê demitizade la religjon o idolatrie dal Stât unitari e centralistic, obleant ducj a meti in prin plan la cuistion dal federalisim, vadì la necessitât indilazionabile di inventâ un mût diferent, alternatîf, inteligjent di jessi talians. Parcè che di là des cjacaris, une robe e je ancje masse clare. Cussì no si pues lâ indenant. Par nissun. Ni pal Nord, ni pal Sud, ni pes isulis. A jerin tantis stradis par dâ dongje la Italie. A àn sielte chê piês: chê de uniformitât che e cope lis culturis e chê de burocratizazion che e cope la inventive e la voie di fâ. Il senatur al à fevelât di secession e ducj a àn tacât a berghelâ. Salacor al à capît che no si pues dismovi cuntune musicute une classe indurmidide o distrate di passe un secul, e alore al à doprât il canon”. “In con des acusis sul egoisim setentrionâl…– Al spiegave simpri pre Toni – “Cui aial mantignude la barache fin cumò? Di dulà sono vignûts il stragjo di miliarts glotûts di chel seglâr cence font che si clamave “Casse dal Misdì”, là che il misdì al jere plui un riferiment gastronomic che gjeografic? Duncje il Nord plui che egoist al è stuf. Cjapant dentri o tacant dal nestri Friûl.” E la Lega Nord in regjon e jere marcade “Moviment Friûl”. La part plui libare e valide dai dirigjents dal MF di chei prins agns Novante a àn stralozât te Lega Nord, dant un imprinting autonomist al partît di Bossi in regjon. Nol jere un câs che in F-VJ e esisteve une LN Friûl e une LN Trieste, rompint e desacralizant ancje culì il dogme de unitât regjonâl e ratificant une diference sostanziâl di identitât e culture. E il bot al è stât tal 1993, cuant che a son rivâts in Consei regjonâl a Triest 18 conseîrs su 60, une sorte di rivoluzion. No simpri lis azions a son stadis claris e coerentis, ma sigûr cu la Lega Nord al guvier regjonâl tal cjamp de autonomie i risultâts otignûts a son stâts impuartants: baste dome ricuardâ la aprovazion de L.R. 15 dal 1996 che pe prime volte e ricognosseve la lenghe furlane trê agns prime de leç statâl 482/1999. E po dopo il tentatîf di creâ pe prime volte une classe dirigjent autonome e autoctone, cuntune serie di personis “furlanis e furlanistis” tes istituzions: Visentin e Fontanin tal parlament roman, Guerra a Cecotti a Triest e po dopo Cecotti sindic di Udin cu la sô “Primavera dell’autonomia friulana” come che le veve batiade Meloni Tessitori intun librut interessant. E tancj sindics e conseîrs sparniçâts tai comuns dal Friûl. Ta chei agns il stes statût speciâl di autonomie al ven une vore implementât. Pensait dome ai doi decims di partecipazion finanziarie in plui pe norme di atuazion che e deve competence primarie su la sanitât. Une vision duncje federaliste e autonomiste de politiche che e informave dutis lis discussions e lis sieltis. E cumò? Une “Lega per Salvini premier” che e à concentrât il podê a Triest, e che si bat pal puint sul Stret di Messine…
Mandi Bossi, cungjò! A mat vie tu âs dit grandis veretâts. ❚